Atualità
Ultimo di per l cuncors dla zircunvalazion de Sëlva
USP – Njenieres y tecnics nteressei possa nchin duman, merdi 3 de fauré de jù si prupostes per la proietazion dla streda de zircunvalazion de Sëlva. 52 ntressei se à fat dé la documentazion y la cundizion de chësc cuncors.
La proietazion ie la pert de majera mpurtanza per abiné na bona soluzion al problem dl gram muvimënt de auti che passa tres l luech de Sëlva. Bele danora fovel da pert dl assessëur ala stredes Florian Mussner unì metù a cuer che l cuncors per la zircunvalazion de Sëlva dëssa purté soluzions che tën no me cont dl luech, ma de duta la valeda y nce di jëufs. Tla prupostes per la proietazion dla streda de zircunvalazion de feter 3,5 chilometri se damanden nce che l vënie respetà cun gran sensiblità la cuntreda, la gran richëza de raions turistiches sciche Gherdëina. L cuncors vëija dant n custimënt nchin a 32 milion de Euro per i lëures.
La prupostes possa unì dates jù nchin duman, merdi 3 de fauré (dala 12.00) tl Ufize provinziel per apalc a Bulsan.
La ideies mandedes ite unirà n iede analisedes te n prim ejam y unirà pona dates inant a na cumiscion per la valutazion. La trëi miëura ideies giaperà nce n pest.as
