Atualità
La EventCard chëst ann nce da Bulsan
USP – Da n Sada Santa, 10 de auril, giaten inò la EventCard. “La cherta à ti ultimi ani drët valù y perchël ons nce ulù la pité chëst ann, cun miuramënc” dij l assessëur ala mubilità Thomas Widmann. Chëst ann vel la EventCard nia me da Maran per la Val Venunesta, ma bele da Bulsan demez.
Cun la EventCard possen furné cun la ferata per jì a fé jites cun la roda. N possa dut l di furné cun la ferata danter Bulsan y Mals y pra la stazions dala rodes mpresté na roda da mont, da zità o da trekking cun leprò nce l casco. Chësta rodes vën mprestedes pra set stazions dla ferata a Bulsan Sud, Maran, Naturns, Latsch, Spondinig, Schlanders y Mals. Sëuraprò vëniel nce sun l Reschen mprestà rodes. Cun l 10 de auril gëura chësta stazions dala rodes, a Bulsan Sud gëurela do Pasca, ai 15 de auril.
La EventCard vën piteda per l cuinto ann ndolauter y aldò dl assessëur Widmann iel n model de mubilità che respetea l ambient. La cherta per ferata y roda costa 16 Euro per i granc. Per families y mëndri vëniel lascià do l priesc: nchin sies ani possen furné debant cun la ferata, la roda costa cin Euro. Da set a 16 ani vëniel pità la cherta per ot Euro, per grupes sëura diesc persones 14 Euro.
Miuramënc ie nce unì fai n cont de viagë cun la ferata. “Ti ani passei fovel d’instà na gran cumpëida de rodes tla ferata y l ne fova plu deguna lerch. Nsci ne puderan chëst ann nchin ai prim de nuvëmber nia plu ciarië rodes tla stazions de Maran, Algund y Marling per la ferates che va tla Val Venuesta” dij l assessëur. N’alternativa vëniel da chësta trëi stazions uni ëura plëina pità n trasport dla rodes. “A chësta maniera ulons ti sparanië l desturb dla rodes sun la ferata y a chëi che à nstës la roda, n bon servisc” dij Widmann. L trasport dla rodes costa cater Euro per roda.
as
