Atualità
Jonta provinziela dl 14 de auril
USP – I assessëures provinziel à ncuei (14 auril) prejentà si prupostes cuncretes per smëndrì la cunseguënzes dla crisa economica mundiela tla Provinzia de Bulsan. La Jonta provinziela ie nsci ruveda dan l ultimo var per stlù ju l pachetl de pruvedimënc. Do la senteda dla Jonta à l Presidënt Durnwalder prejentà de plu ponc de majer nteres.
Pruvedimënc n cont dla crisa economica
I assessëures provinziei à ncuei dat ju si prupostes de pruvedimënc per smëndrì la cunseguënzes dla crisa economica mundiela tla Provinzia de Bulsan. La prupostes ie unides analisedes te jonta y unirà scrites adum da na cumiscion de 5 o 6 persones. Nchin a n vënderdi da mesdì dëssa chësc scrit uni dat ju al Presidënt dla provinzia che l purterà n lunesc te Jonta per pudëi l dé pro.
“Ne puderon nia tenì su la crisa, ma ulon judé che l’economia tla Provinzia de Bulsan posse lauré inant y che l vënie mantenì la stieres” à dit Durnwalder. “Sce families ruva ala strëntes ajache n à perdù l lëur y l ie da paië ju debic, pona ulons ntervenì”.
Ntervënt per l tremot
77 ulenteres dla grupes di destudafuech dl Südtirol y 14 persones di destudafuech prufesciunei de Bulsan ie unic mandei tl Abruzzo cun 27 mesuns per judé ala persones tuchedes dal tremot dl’ena passeda. L presidënt Drunwalder à ncuei prejentà chësc ntervënt te Jonta provinziela. A Sant’Elia, a puec chilometri da L’Aquila à i uemes de Südtirol metù su tendes per la persones che à perdù la cësa. “Al mumënt njenià i nosc da maië per 500 persones, ma ti proscimi dis deventeral 750 persones” à dit Durnwalder. Canche l unirà mandà do d’autra jënt a se baraté ju cun i uemes di destudafuech che ie śën tl raion dl tremot, ne san mo nia avisa. Da uei iel nce tan giut che dëssa duré l ntervënt nstës. La Jonta provinziela à ncuei dat pro 270.000 Euro ora l fond de resserva per chësc ntervënt de prëscia. L presidënt Drunwalder rengrazia duc chëi dl Südtirol che juda ai tuchei dal tremot tl Aburzzo.
Inn provinziel
L pez “Zu Mantua in Banden” possa unì ciantà y sunà sciche l ie ti ani passei for unì fat. “Ne on nia debujën de fé na lege che chësc pez sibe l inn provinziel” à dit Drunwalder, “N inn dëssa fé tenì adum la persones, ma nia vester argumënt de stritoc danter grupes de rujeneda”. Te duta la Talia ne à la regions nia n inn detlarà per lege y nsci dëssel nce vester per la Provinzia de Bulsan.
Referendum de utober
L presidënt dla Provinzia fej al savëi che ai 25 de utober uniral tenì de plu referendum che fova bele unì dai pro te Cunsëi provinziel. L se trata de cin referedum che unirà duc tenì te un n iede.
Scoles privates
Sce la scoles privates tën ite cër criteries dëssa chëstes giapé l medem sustëni finanziel. I scioldi unirà paiei ora tres l assessëur de cumpetënza aldò dla grupa de rujeneda. Cun chësta regulamentazion à la Jonta provinziela udù dant diretives nueves per judé a frabiché scoles privates.
Raions dëibli de strutures
La sëides di raions dëibli de strutures dëssa unì metudes da nuef. L ie per ejëmpl raions turisticamënter stersc, ma dëibl de produzion. Cun criteries nueves, che la Jonta provinziela à dat pro, possel unì detlarà raions dëibli de trëi categuries. A chësta maniera puderal unì jit ncotra cun na lingia de pruvedimënc a na maniera da miuré la situazion. Ti proscimi mënsc dëssel unì tëut la dezijion definitiva n cont dla sëides de chisc raions.
Nia de plu ncëries
Cialan danora ala veles de chemun che sarà n auter ann d’ansciuda à la Jonta provinziela dat pro normatives nueves che ne azetea nia de plu ncëries. Dantaprima se tratel de culaburadëures dl Servisc de Forestela che à na funzion da polizai y che ne possa nia tl medem mumënt vester ambolt o assessëur de Chemun. La normatives nueves ne azetea nce no che un dla Forestela devënte presidënt de Comunità raionela, diretëur de n raion da ciacia o da pië pësc, cumandant di destudafuech o che l feje pert dla direzion de aministrazions a pert.
Vieresc contra la fuera
Tla Provinzia de Bulsan iel 1.200 caji che se damanda vieres o parëies che tën su la fuera dla stredes prinzipeles. La Jonta provinziela à sun pruposta dl assessëur Florian Mussner dat pro de judé nchin tl ann 2013 a fé vieresc contra la fuera te 800 cëses. L unirà dat n cuntribut de 200 Euro per meter cuadrat.
Dunazion de sanch
A una cun l’urganisazion de dunazion de sanch AVIS iel unì dat pro l program per la dunazions de sanch nchin tl 2011. Al mumënt iel 15.667 persones scrites ite ala lia che tl ann 2008 à dat de ndut 27.000 litri de sanch. “Ulessan mantenì l livel de dunazions a na maniera che l vën dat tan de sanch sciche l vën nce adurvà tl Südtirol” à dit Drunwalder.
as
