Atualità
Mussner gëura ai 9 de mei l zënter culturel te Sëlva
USP – Te Sëlva à l Istitut Culturel Ladin, l Chemun y la Bibliotech laurà deberieda per crië n zënter culturel. I locai nueves y locai che vën nuzei deberieda vën prejentei n sada ai 9 de mei dala cater domesdì cun la giaurida y n domesdì de porta davierta. L assessëur provinziel Florian Mussner giaurirà deberieda cun l ambolt de Sëlva Roland Demetz chësta prima pert de chël che deventerà l zënter culturel da Nives.
La sënta dl Istitut Culturel Ladin te Sëlva, la Bibliotech Oswald von Wolkenstein, la scolina Surëdl y la scola elementera ie ujins tl raion de Nives. Cun l proiet de fé ora dl tublà da Nives na luegia per mostres y manifestazions deventerà dut l raion n drë zënter culturel. N sada uniral giaurì la prima pert de chësc zënter cun i locai fai ora da nuef tl Istitut y Bibliotech. La sezion linguistica y lessicografica dl Istitut ie deventeda dut un cun la bibliotech y possa śën lauré deberieda te n liam mo plu strënt. Tres i lëures de ressanamënt à l Istitut culturel nce giapà n local per i cursc de rujeneda che vën curei dal Servisc de furmazion.
Da duman juebia nchin a sada danmesdì (7 – 9 de mei) jirà la scoles a vijité la sënta nueva.
Duta la populazion ie nvieda n sada domesdì, ai 9 de mei, dala cater domesdì inant a vijité la sënta, cun la prejentazion dla publicazions y scumenciadives. Te chësta ucajion uniral nce prejentà la nueva plata internet dedicheda ala mostra itineranta Viac tla Ladinia, che ie unida anjenieda te cater rujenedes.
as
