Atualità
Televijion digitela dal 28 de utober
USP – Dal 28 de utober nchin ai 11 de nuvëmber uniral tla Provinzia de Bulsan, n var al iede destudà ju la televijion analoga y mandà ora l signal digital. Deberieda cun l vizeminister talian ala comunicazion Paolo Romani à l presidënt dla provinzia Luis Durnwalder dat l scì per scumencé cun la mudazion.
De plu programs, na miëura cualità per udëi y audì, la puscibltà de na televijion interativa y na gran ressoluzion ie i vantajes che porta la tecnica de trasmiscion digitela. I svantajes ie plutosc puec tenian cont che feter 80% dla cëses à bele anjenià l decoder che n adrova per udëi la televijion digitela. La televijions nueves à bele l decoder ntegrà, la vedla televijions adrova n tel aparat per no resté dan l fosch canche l unirà fat la mudazion.
Sciche Durnwalder à lecurdà ne ie la televijion digitela nia na nuvità. La RAS y la RAI manda bele ora da n pez l signal digitel. Da nuef iel plu che auter che dal 28 de utober unirà destudà l vedl sistem. L vizeministier Romani à lecurdà che per seniores sëura 65 ani, che à n davani nchin a 10.000 Euro, dà l Stato aiuc.
Cun la trasmiscion digitela saral tla Provinzia de Bulsan nce da udëi de plu programs. Ciuni che chisc sarà unirà permò fat ora dala Jonta provinziela. Bonamënter saral da udëi la televijion dl Bayern.
Duta la nfurmazions sun mudé dl sistem de trasmiscion televisiva ie nce da abiné te internet sota www.provinz.bz.it/digitaltv o www.ras.bz.it.
as
