Atualità

Politica | 29.08.2011 | 14:18

Manovra finanziera: Jonta provinziela tën sun Autonomia y Acurdanza de Milan

USP – Co che la Jonta provinziela uel se muever y cie che se lascia fé n cont dla manovra finanziera da pert dl Guviern Talian ie stat n majer argumënt tla prima senteda do la paussa da instà, (NCUEI) ai 29 de agost a Bulsan. Da una pert se damanda i assessëures a Bulsan che vënie respetà l’Autonomia y dal’autra pert iesen anjeniei per tò su tratatives n cont di pruvedimënc nueves.

A Roma vëniel di per di rujenà de pruvedimënc sciche l auzé la chëuta IVA, de slungë i ani per pudëi jì n pension o de chëutes sun l avëi. “L ie bele unì njenià na pruposta per n articul de lege che pruvedimënc per ressané la finanzes stateles ne possa nia tuché la cumpetënzes garantides dal statut de Autonomia” à dit l presidënt dla Provinzia Durnwalder riesc do la senteda. L ie tlo unì fat referimënt la mëter adum de mëndri chemuns, de stlù istituzions cun manco de 70 dependënc (sciche l Eco center o l’agenzia Cësa Tlima) y cumpëida y paiamënc per Cunsëies chemunei y provinziei.

N cont dla finanzes ne puderà la Provinzia ne se desfé de si respunsabltà. “Chël che l Stat à dat ora ti ani passei ie n pert nce jit a bën de nosc raion, nscila messerons śën nce nëus judé pea a sparanië” à dit Durnwalder. Tres l’Acurdanza de Milan iel unì segurà che 90% dla chëutes dl Südtirol resta a Bulsan. N cont dla 360 milion per roma à l presidënt lecurdà che la provinzies de Trënt y Bulsan à bele renunzià sun 500 milion da pert dl Stat, giapan perchël cumpetënzes nueves. Chësta acurdanza possa me unì mudeda cun tramedoi pertes a una. “Ne son nia boni de ti dé de plu a Roma, ma messon marciadé sun cie che son boni de renunzië” à dit l presidënt dla Provinzia. Sce l vën fat pruvedimënc nueves per ressané la finanzes stateles, dëssa la ntredes ruvé a Roma. “Bulsan ne puderà te n tel cajo nia pertënder de se tenì velch” à dit Durnwalder. A Roma uelen arjonjer che l vënie tratà a pert cun la regions autonomes.