Atualità
Di dla Cultura Ladina ai 30 de setëmber
USP – La fazion dla cumpededa dla jënt y dl pruporz che vën a se l dé dala detlarazion de grupa rujeneda ie i doi argumënc zentrei dl Di dla Cultura Ladina. L danmesdì per se dé jù cun chësta tematiches a unirà, n vënderdi ai 30 de setëmber, giaurì cun na ntroduzion dl presidënt dla Provinzia Durnwalder y dl assessëur ladin Mussner.
La stieres publiches, i aiuc per cuatieres y l finanziamënt de istruzion y cultura vën tla Provinzia de Bulsan spartì n proporzion dala grandëza dla grupes de rujeneda. Chësta spartizion, tlameda pruporz, vën fata sun la basa dla detlarazion de grupa de rujeneda che vën chëst ann d’autonn inò fata da nuef n ucajion dla cumpededa dla jënt. La detlarazion de grupa de rujeneda à perchël na fazion per i proscimi 10 ani y per l daunì.
Pra na mëisa de descuscion ti cialeran al pruporz te na pruspetiva dl daunì che tën cont dla situazions nueves de families plurilinguistiches y dl’imigrazion de chisc tëmps. Tlo rujeneral l assessëur ladin Florian Mussner deberieda cun Silvia Alfreider dl Museum Ladin y i aucac Manuela Obojes y Thomas Piccolruaz. La muderazion unirà fata da Edith Ploner.
L Di dla Cultura Ladina, n vënderdi ai 30 de setëmber tl Palaz Widmann a Bulsan, scumëncia dala 9.00 danmesdì y jirà inant nchin da mesdì. Davia che l Di dla Cultura Ladina ie pensà per la populazion de duta trëi grupes de rujeneda iel nce udù dant na traduzion simultanea.
---
Culaburadëures di media ie nviei al tò pert al Di dla Cultura Ladina y de cunedì i cuntenuc.
as
Galaria dales fotografies
L Di dla Cultura Ladina unirà tenì n vënderdi ai 30 de setëmber tl Palaz Widmann a Bulsan.
