Atualità
Nosc sentimënt fej viver la rujeneda: Mussner per l Di nternaziunel dla rujenedes
USP – La mpurtanza dla rujeneda dl’oma, vën NCUEI ai 26 de setëmber sorisseda particularmënter n ucajion dl di nternaziunel dla rujenedes. L assessëur ladin Florian Mussner sorissea che la rujeneda dl’oma ie pert de nosta identità y che l ne se trata nia me de paroles ma dl’esprescion de nosc vester.
Per l viver inant dla rujenedes, dantaldut per chëles de mendranza iel dassënn mpurtant che les vën recunesciudes ufizialmënter y tlo muessen di che nosta provinzia à laurà drët bën de chësc vies n culaburazion cun duta la istituzions sciche scola, museums, istitut ladin y media. Mo na majera mpurtanza à la persones, la families che ie n pue’ sciche na cuna dla rujeneda. L ie dassënn mpurtant che la families debe inant a nosta generazions che vën do la legrëza y la cuscienza dl valor dla rujeneda dl’oma – nce sce la ie de mendranza. L ie da udëi sciche na particularità y spezifizità che à na ravisa sterscia y che se gëura tl medemo mumënt nce a mparé rujenedes.
Dantaldut chëst ann, canche do 10 ani vëniel inò fat la cumpededa dla jënt, iel dassënn mpurtant tò su la nfurmazions sun la detlarazion dla grupa de rujeneda. La mpurtanza de se sentì ladins, de se detlaré ladins ie fundamentela per purté inant nosta rujeneda, cultura y identità tl daunì.
as
