Desvalì | 05.10.2011 | 13:48

L scumëncia la cumpededa dla jënt cun detlarazion de grupa de rujeneda

USP –La cumpededa dla jënt che scumëncia cun l 9 de utober cumporta na basa de programazion per l’aministrazion publica. La detlarazion de grupa de rujeneda anonima vën damandeda per spartì su la ressorses publics a na maniera giusta y nsci per garantì pesc danter la grupes de rujeneda. Ai cuestioneres possen respuender online, la detlarazion de grupa de rujeneda possa mé unì fata su papier.

Uni 10 ani vën fata na cumpededa dla jënt a na maniera che l’aministrazion pubilca giape nfurmazions segures per prugramé pruvedimënc. L se trata de na nrescida che vën fata sun duta la populazion y nia me sun na selezion de zitadins sciche pra d’autra nrescides. Perchël à i resultac dla cumpededa dla jënt mo na majera forza de esprescion. Chësta nrescida ie fata de doi pertes: la cumpededa di zitadins cun si abitazions y la detlarazion de grupa de rujeneda. La gran mpurtanza de chësta nrescida ie unirà sorisseda (NCUEI) ai 05 de utober dal presidënt Luis Durnwalder te na cunferënza stampa te chëla che Alfred Aberer y Johanna Plasinger dl Astat à prejentà nfurmazions de carater pratich.

Detlarazion de grupa de rujeneda

Per pudëi spartì stieres, aiuc per l cuatier y l finanziamënt de cultura y furmazion a na maniera giusta danter la grupes de rujeneda, vëniel tla provinzia de Bulsan nce damandà na detlarazion de grupa de rujeneda. Da nuef iel chëst iede che l vën me plu damandà la detlarazion anonima per l pruporz. Chësta detlarazion ne à deguna fazion sun la singula situazion persunela, ma me sun la grupa de rujeneda. L pruporz garantësc na spartizion aldò dla grandëza dla grupes de rujeneda, l ie n strumënt per defënder dantaldut la mendranza garantian che les ne ebe nia svantajes. L presidënt Luis Durnwalder à nvià la populazion a na detlarazion senziera de coche uni un se sënt dedite.

L Statut de Autonomia vëija me dant trëi grupes de rujeneda per l pruporz. Chiche ie zitadin talian, ma ne se sënt no tudësch, no talian y no ladin, possa se detlaré agregà a una dla trëi grupes.

La detlarazion de grupa de rujeneda possa mé unì fata sun papier. La persones nciariedes dai chemuns purterà la plata n cësa y unirà pona inò a tò la cuverta stluta. Chësta detlarazion anunima ie ududa dant per i zitadins sëura 14 ani. Per mutans y mutons sota 14 ani, muessa i genitores fé na detlarazion sun la zedula de culëur rosa y pona nce la de ju tla cuverta de culëur rosa.

La detlarazion persunela de grupa de rujeneda ie unida spartida defin dala Cumpededa dla jënt. Chësta vën me plu fata un n iede tla vita tla suneria y ne adrova perchël nia plu da unì renuveda. Sce zachei l adrova per na stiera publica o ulëssa la mudé, possel l fé te uni. Per schivé meladurvanzes vel la mudazion permò do 18 mënsc.

Cumpededa dla jënt

Nfurmazions sun feter 500.000 zitadins, 210.000 families y 80.000 abitazions vën damandedes do tres cuestioneres che reverda la persones y l’abitazions. I resultac de chësta nrescida prejentà n cheder plu avisa aldò de chël che l possa unì prugramà servijes publics, strutures y pruvedimënc.

Chisc dis giapa la families na lëtra de nfurmazion dal ASTAT cun la nfurmazions de utl. Ai cuestioneres possel unì respundù a de plu manieres. La maniera plu scëmpla ie tres internet, sun la plata web www.provinzia.bz.it/volkszaehlung. “Sce trueps se nuzea de chësta puscibltà cumporta chësc n gran sparani de lëur per i chemuns y per l’analisa” à spiegà Johanna Plasinger dl Astat. L login persunel vën mandà ora tla lëtra dl ASTAT. Chësta maniera de respuender online ne muessa nia unì fat duta te un n iede, n possa nce se fermé y fé inant n auter iede.

Chiche adrova n aiut a respuender i cuestioneres possa se lascé judé dai culaburadëures di chemuns che à fat la furmazion aldò. Te de plu chemuns vëniel pità chësc servisc te n ufize dedicà. Sce l ne ie nia mesun respuender ala nrescida tres chësta pusciblteies, vën una dla 800 persones nciariedes dai chemuns n cësa y porta i cuestioneres.

L ne ie nia da se spazé a scrì ora i cuestioneres dla cumpededa, che muessa unì dai ju nchin te trëi mënsc (cater mënsc ti majeri chemuns). “Purempò fossel bon sce l ne vën nia aspità nchin ala fin dl ann, ma l unissa tosc dat ju la respostes, scumencian dal 9 de utober” à dit l diretëur dl Astat Alfred Aberer.

Nfurmazion y spiegazions iel nce da giapé sun la plata web. Tlo possen nce se tò ju ejëmpli de cuestioneres aldò dla cumpëida de persones tla familia y dla grandëza dl chemun. Danter chisc documënc PDF iel nce na verscion per ladin. La respostes ai cuestioneres possa pona me unì dates ju tla verscion tudëscia o taliana. N servisc de nfurmazion y assistënza sëuraprò pieta l ASTAT nce cun si jënt cumpetënta tres telefonn al numer vërt 800 649 122.

as

Galaria dales fotografies

Prejentà y sorissà la mpurtanza dla Cumpededa dla jënt: l diretëur dl Astat Aberer, l presidënt Durnwalder y la diretëura de ufize Plasinger (foto USP/Pertl).

Downloads