Atualità
Dat pro dala Jonta provinziela ai 30 de dezëmber
USP – Te si ultima senteda dl ann à la Jonta provinziela, (NCUEI) ai 30 de dezëmber dat pro na lingia de pruvedimënc. L presidënt Durnwalder à riesc do la senteda prejentà i ponc de majer nteres.
Per fermé l svilup dl crëibes ai stentins uniral n auter ann nvià via n program speziel de analisa. Dal prim de lugio messerà duc i zitadins nchin 69 ani lascé analisé l sanch. N se aspieta che 5% dla populazion ie tucheda da chësta malatia.
La gestions de 24 uties da mont che ie passedes ala Provinzia vën slungëdes de n ann ala medema cundizions. Bele da n ann y mez ëssa la 24 uties che fova dant dl CAI pudù unì menedes autonomamënter, ma l macia mo for l’ultima acurdanzes cun l Club Alpino Italiano. Peran che chëstes sarà a post, uelen aldò dl presidënt Durnwalder meter a jì n scumenciamënt nuef te na culaburazion a livel provinziel danter CAI, AVS y Provinzia.
3 milion de euro ie unic metui a desposizion per pruvedimënc contra l’ arbanduneda di raions da mont. Proscimamënter uniral valutà plu avisa ciun pruvedimënc che unirà trai tres ti chemuns plu resiei de pierder populazion.
La puscibltà de fé dumandes de cuntribuc per proiec turistics unirà data nce tl ann n nuef. Chësc reverda luesc turisticamënter nia tan svilupei cun manco de 500.000 euro de volum de afares. Per proiec turistics te raions cun n majer volum de afares mprësta la Provinzia scioldi a bon priesc tres l fond de rotazion. Per firmes che vën metudes su da nuef o che vën sëurandates vëniel fat na ezezion dajan mprësć a bon priesc nchin a 30.000 euro, unfat te cie raion che ie la sënta. “Ntan l ann che vën fajons cont de slargë ora i cuntribuc nce a raions turisticamënter svilupei” à dit Durnwalder.
I lëures per doi stredes de zircunvalazion te Puster va inant. Do avëi abinà n’acurdanza cun la rë per l gas SNAM puderan scrì ora i lëures per l segondo lot dla zircunvalazion de Vandoies. Sun pruposta dl assessëur Mussner iel unì azetà la carateristiches tecniches per pudëi proieté la zircunvalazion de Percha. Per chësta streda iel udù dant na nvestizion de 59,3 milion de euro.
Formes nueves de ciarië energia dëssel da moinla unì pità pra la pumpes dal penzin. Stazions nueves muessa avëi n mplant fotovoltaich sun tët y pité sëuraprò nce da ciarië gas metan y strom.
La partizion dla scoles per i proscimi 5 ani muessa unì fata da nuef. “Direzions cun manco de 300 sculeies muessa unì tëutes demez, ma fajon n’ezezion per la situazion particulera dla val di Non auta” à dit Durnwalder. Do avëi audì l cunsëi scolastich fejen cont che la direzions dl lizeo scientifich y dla scola per geometri tla streda Fago a Bulsan unirà metudes adum.
Per l museum sota l monumënt dla vitoria a Bulsan ie unì anjenià n’acurdanza che dëssa unì sotscrita de jené. Pernan che la Provinzia, l Chemun de Bulsan y l respunsabl per monumënc d’ert dl raion de Unieja arà sotscrì, puderan jì inant cun l scumencé di lëures. Cun l finanziamënt de 200.000 euro da pert de Provinzia y Chemun, uelen prejenté tëmps de ditatura sota l fascism y l sozialism naziunel. La Jonta provinziela ie stata a una cun l program di lëures y i cuntenuc dl zënter de documentazion storica. Te 13 locai sota l monumënt dësse unì dat inant savëi sun cie che à fat l fascism y l sozialism naziunel tl Südtirol.
as
