Atualità
Ai 2 de fauré ancunteda cun Mario Monti – reduzion di cunsëies
USP – L’ancunteda dl presidënt dla provinzia Luis Durnwalder cun l presidënt di ministri Mario Monti, n juebia ai 2 de fauré a Roma, ie unida trateda dala Jonta provinziela. – Reduzion di cunsëies di chemuns y dla Provinzia.
Do avëi rujenà dla situazion finanziera n generel uel l presidënt Durnwalder sëurandé n promermoria de co che n se magina da pert de Bulsan y Trënt de la mëter a jì danter Stat la doi provinzies autonomes. “Me magini che Monti nes fajerà al savëi na persona de referimënt per jì inant cun la tratatives nce do l’ancunteda de n juebia” à dit Durnwalder te cunferënza stampa. I ponc de majera mpurtanza reverda la situazion finanziera, la cumpetënzes dla provinzia y la normes de atuazion che n aspieta bele dai ani, la liberalisazions y chëi pruvedimënc dl Stat che ne respetea nia l Statut de Autonomia. “Ulon fé nosta pert per judé a ressané la finanzes dl Stat, ma dal’autra pert muessa nosta Autonomia unì respeteda y l muessa nce unì tenì cont di sacrifizi che on bele fat” à dit l presidënt dla provinzia.
Argumënt de descuscion te Jonta provinziela ie nce stata la ndicazion da pert de Roma de smendrì la cumpëida de cunselieres provinziei y regiunei. La cumpetënzes per se paré da chësta nuvità ie defrëntes. “Per la cumpëida de cunselieres provinziei muessa se dé da fé l Cunsëi provinziel” à dit Durnwalder. Aldò dl decret Monti dëssa servijes a livel de chemun me plu unì pitei aldò dla cumpëida dla populazion, a chësta maniera unissel sfurzà a mëter adum servijes. Di cunsëies chemunei y de cumenanzes de raion, muessa aldò de Durnwalder se cruzië la Region.
as
