Atualità
Lege nueva per l cumerz va n droa (duman) ai 21 de merz
USP – N mierculdi ai 21 de merz va n droa la lege nueva per l cumerz. “Cun la regulamentazion nueva ons cialà de nuzé la pertes positives de tant che l Guviern Monti nes à metù dant n cont de liberalisazions y dal’autra pert ons cialà de defënder nosc sistem che va bën” dij l assessëur Thomas Widmann. La lege nueva ie (NCUEI, ai 20 de merz) publicheda tla Gazëta ufiziela.
L regulamënt provinziel per l cumerz fova nchinamò udù drët sciorf. Chësc ie da capì ajache la Jonta provinziela se ova tëut dant de mantenì la strutura cumerziela ti luesc y tla ziteies per garantì la butëighes daujin ala cëses. Per chësta rejon se an daniëura parà contra i majeri zëntri cumerziei. La mpustazion de liberalisazion da pert dl Guviern Monti ëssa drusà l sistem dl Südtirol. “Sce assan sëurantëut bel avisa chël che l Guviern à metù dant, assan abù dut n sotsëura, zënza na planificazion da fundamënt n cont de cumerz y di raions” dij l assessëur Widmann.
Per mantenì la pertes stersces dla politica sun l cumerz dl Südtirol se an stizà sun la cumpetënzes dl’Autonomia limitan la liberalisazions ai zëntri di luesc. “Iló ie la liberalisazion nce per zeche, ajache la dà na puscibltà nueva de dé vita ai luesc y ai zëntri” spiega l assessëur provinziel. Ora di zëntri resta la regulamentazion sciorfa. Te raions de produzion saral me mesun vënder chël che fova nchinamò bele lascià pro, ti raions categurisei vërt agricul ne possel de prinzip nia unì vendù a detail. La sëula doi ezezions reverda prudoc che ie unic fai sun l luech da paur y chëi che à na relazion cun strutures de tëmp liede, sciche pra la stredes dala rodes o plazes da golf.
La lege per l cumerz dl 16 de merz 2012, nr. 7, ie publicheda tla Gazëta ufiziela nr. 12 a jirà n droa ai 21 de merz.
as
