Atualità
Trëi intendënc a Urtijëi por miorè le contat danter les scores
USP – I trëi intendënc dles scores dla Provinzia de Balsan s’à incuntè (INIER) ai 29 de merz tla sënta dl lizeo artistich y dla scora profescionala da Urtijëi por miorè le contat y laurè inant sön la bona colaboraziun danter les trëi Intendënzes.
L’Intendënt ladin Roland Verra à mostrè sö les particolaritês dl model paritetich ladin, che i ghesć à podü osservè tratan la vijita tles tlasses. L’Intendënt todësch Peter Höllrigl y la Intendënta taliana Nicoletta Minnei à mostrè scialdi tröp interès por les soluziuns didatiches particolares dl sistem scolastich ladin.
L’incuntada fej pert de na colaboraziun plü ampla y intensiva che dess jì inant tl tëmp inće cun barać de scolars tl cheder dl proiet “N ann tla scora dl ater grup linguistich”.
La direturia dl lizeo y dla scora profescionala Elisabeth Baur y le diretur dl Istitut Raetia Bruno Senoner à acompagnè i intendënć tles tlasses y ti à presentè les ativitês formatives dles döes scores cun les seziuns d’ert visuala, grafica y design, y cun i laboratori de scoltöra y pitöra dla scora profescionala. Ai ghesć ti él gnü surandè n laûr artistich di scolars dl lizeo “Cademia” sciöche recort dla incuntada.
usp
