Atualità
I laûrs pro le Museum Ladin à metù man
USP – Pro le Ciastel de Tor àn metü man da ciavè grunt por fà n depot por le Museum Ladin. Do passa diesc agn de ativité dl museum é le bojëgn, da podëi mëte ia esponacte n post adatè, gnü tres majer. L’Assessorat provinzial por i laûrs publics mët a desposiziun cun chësta investiziun n tòch de strotöra implü por l’ativité culturala ladina.
![](/news/img/lazy.gif)
Le depot dl Museum Ladin vëgn fat daldöt sot tera, al medemo livel dl’alzada olache al vëgn fat les mostres. Chisc dis àn metü man da ćiavè a na moda da ti fà lerch a na cubatöra de 1.750 metri cubics. Le depot proietè é feter 400 metri cuadrać gran. Dlungia i mebli adatà por la conservaziun di esponać él inće de gran importanza da avëi la dërta temperatöra y le dër’ grè de töme, acioche les pitöres, i documënć y i esponać plü ziti ne se rovines nia cun le tëmp. Tl proiet él inće odü danfora n lift por portè i esponać plü pesoć tl depot sot tera y da ilò inće tl salf dles mostres.
Le museum ne n’é nia ma gnü fat por mostrè sö la cultura ladina, mo inće por fà inrescides y archivié testemonianzes de nosta vita ladina. “Cun na investiziun de 814.828 euro podunse mëte a desposiziun n post adatè, acioche al pois gnì laurè ćiamò damì te chësc ćiamp cultural” spliga l’assessur Florian Mussner.
Al é preodü de stlü jö i laûrs d’isté. Por surandè chisc laûrs él gnü damanè set firmes. La firma Bioc Bau é stada la sóra che à fat para al concurs y à insciö ciafè la inćiaria.
Le depot rové ne sarà nia davert al publich, “porimpò gnaràl arjigné a na manira che al sides interessant da odëi por esperć y jënt competënta” spliga Heinrich Huber, presidënt dl comitê scientifich dl Museum Ladin. Na manira moderna da visualisé y cataloghisé i esponać porta pro a na revalutaziun por le Museum, sotrissëia le presidënt.
as