Atualità
Cuntroi dla cumpededa dla jënt
USP – Feter 500.000 zitadins, 210.000 families y passa 80.000 cëses ie d’autonn stai l cuntenut dla cumpededa dla jënt. Ntan la proscima enes muessa 3131 families mo tenì pea per cuntroi che ie debujën per garantì la cualità dla nfurmazions purtedes adum. Proscimamënter sarà pona l Istitut de statistica de Stat ISTAT a publiché i prim resultac.
Uni diesc ani vëniel cumpedà do la populazion de duta Europa. Tla Talia se cruzia l ISTAT de chësta cumpededa, tl Südtirol iel l ASTAT. Da utober nchin ala fin dl ann passà iel cun l aiut de 800 nciariei y per l prim iede nce tres internet, unì tëut su la nfurmazions de duc chëi che vif tl Südtirol. L Istitut de statistica muessa śën cuntrolé la cualità dla nfurmazion cun proves trates ora a sort. La se trata de pudëi sciazé tant che n possa se lascé sun la respostes che ie ruvedes ite. Mplu vala nce de nrescì tan de persones che ie unides cumpededes te doi chemuns o che ne ie nia unides cumpededes pea.
A livel talian vëniel cumpedà do te 255 chemuns. Tl Südtirol iel unì trat ora Bulsan, Maran, Leifers, Sarentin, San Ciana y Nals. Te chisc chemuns muessa de ndut 3131 families respuender a n pitl cuestioner. I cuntroi unirà fai nchin ala fin de mei.
as
