Atualità
Azetà n proiet de segurëza te Sëlva
USP – La segonda cumiscion provinziela per la scunanza dla cuntreda à te si senteda de n merdi, ai 24 de auril azetà n ntervënt per tenì su sasc che manacia de tumé ju te Plan, tl Chemun de Sëlva.
L Chemun de Sëlva se à tëut dant de fé pruvedimënc per seguré l raion pra l hotel Pralong, te Plan, da sasc che manacia de tumé ju. Nscì uniral proscimamënter realisà n proiet che fova bele unì data pro dl 2006 y che ie dopro mo unì mudà. La cumiscion provinziela cun si presidënt Adriano Oggiano à azetà che sun na lunghëza de 134 metri vëniel fat n col aut danter 3 y 8,4 metri. Chësc dëssa pona unì fat crëscer ite. Dessëura pert iel sun na lunghëza de 50 metri udù dant na prutezion dai sasc auta 5 metri. Per ruvé permez a chësta prutezions y per desćiarië material, uniral fat na pitla streda de 140 metri y lergia 3,5 metri.
La cumiscion per la scunanza dla cunteda à azetà l proiet a cundizion che la lueges de ntervënt vënie riesc fates crëscer ite.
as
