Atualità

Desvalì | 16.11.2012 | 18:01

Internet a slune ie ruvà tl raion dl Scilier

USP – Tl raion dl Scilier iel unì njenià la cundizions per taché ite i culegamënc internet a slune. La zentreles de Sëuc y Völs, vijitedes (INIER) ai 15 de nuvëmber dal presidënt dla Provinzia, ie me doves de 155 che vën mudernisedes dala Telecom. Nchin ala fin dl ann iel danter auter nce udù dant de taché ite la zentrela a Mantëna Todëscia.

La zentreles ADSL tl Chemun da Ciastel y Völs fej pert dla 155 zentreles che aldò de n'acurdanza danter Jonta provinziela y Telecom vën adatedes al internet a slune. Chisc lëures fej pert dl mpëni dla Jonta de taché ite duc i chemuns dl Südtirol cun i culegamënc de fibra otica. Tl'acurdanza se mpënia la Provinzia de ti fité ala Telecom i culegamënc che ie unic fai tla valedes prinzipeles y tla valedes da na pert ora. La Telecom, dal'autra pert, se à tëut su de taché ite si zentreles al rë de fibra otica y de adaté si aparac fajan n nvestimënt de 3,6 milion de euro.

Tla zentreles, sciche chëla de Völs, vëniel spartì su l culegamënt che ruva adalerch tres la fibres otiches metudes ju dala Provinzia. Da tlo vëniel tacà ite la cëses y la strutures publiches ala rë de internet a slune. Tl cërtl de feter cater chilometri possel unì dat inant l internet a slune se nuzan nce dla linies dal telefonn che ie bele. La strutures publiches vën tachedes ite dala Provinzia y per la cëses privates se cruzia i chemuns sun la basa de n masterplan che i à nstës lascià lauré ora. Provinzia y Chemuns à nstësc na rë de fibra otica, y la firmes privates possa fité i culegamënc dal'aministrazion publica.

N ucajion dla vijita a Völs y Ciastel à l presidënt dla provinzia Luis Durnwalder sorissà che l program de culegamënc internet a slune à l fin de judé i raions da na pert ora a tenì pea sun i marcieies. "Cun i culegamënc vën i raions da na pert ora revalutei y a chësta maniera uelen schivé che la jënt se n vede dai pitli luesc. Chësc ie me puscibl sce ti raions da na pert ora possel unì segurà l'economia y a chësta maniera la stieres". Sce ti dejeneies passei iel unì fat stredes, se tratela śën de mëter a jì l internet a slune che fej da fundamënta per nia pierder l cuntat cun l mond. La Jonta provinziela se à perchël tëut dant de arjonjer nchin ala fin dl 2013 duc i chemuns cun l internet a slune.

N var al iede unirà i culegamënc de fibra otica metui a desposizion dla Telecom. Do la sëurandata à la Telecom sies mënsc per ti pité i culegamënc ADSL ai zitadins. Nchin ala fin dl 2012 aran metù ju 650 chilometri de roles y 560 chilometri de fibra otica. Te chësc mumënt iesen tl lëur de proieté l'ultima pertes per na soma de 170 chilometri. Nchin al fin de n auter ann uniral nce tacà ite la Val Badia da S. Laurënz nchin a La Ila y Gherdëina, da Ciastel nchin te Sëlva. L culegamënt che la Telecom ova fat te Gherdëina ie bele drët vedl y cun i cabli nueves dla Provinzia uniral fat n gran miuramënt.

La dificultà ie dantaprima i raions de sëida. "Tlo cialons de curì i culegamënc cun alternatives o tres na culaburazion cun Trënt, sciche tl cajo de Altrei" spiega l assessëur Florian Mussner, cumpetënt per l program de internet a slune.

Danter la prima 9 zentreles che ie bele unides tachedes ite ie nce chëla de S. Ciascian. Nchin ala fin de chësc ann iel nce udù dant de taché ite la zentrela a Mantëna Todëscia, ala portes dal Val Badia.

I lëures per mëter ju la roles danter Longega y Al Plan de Mareo ie bele unic sëurandai. Aldò dla firma nciarieda uniral mo scumencià d'autonn o scenó d'ansciuda.