Atualità
CD de cianties per l nseniamënt te scola: prejentazion ai 20 de merz te Sëlva
USP - Per sustenì l cianté te scola fovel bele dan man n liber cun cianties per talian. Śën iel unì tëut su na CD per l nseniamënt tla scolines y tla scoles elementeres. L proiet nuef dl Servisc Inuvazion y Cunsulënza per la scoles ladines unirà prejentà ai 20 de merz te Sëlva.
Per cianté te scola possa maestres y maestri sëuraprò al liber »Canzoni, canzoncine e filastrocche« śën nce se jué de doi CD nueves. La cianties ie unides anjeniedes ca dal maester Paul Senoner che les à nce nseniedes ite a Elena Cortoni, Alex Designori y Giacomo Talarico dl Cor di Mutons de Sëlva. L Servisc Inuvazion y Cunsulënza per la scoles ladines à realisà chësc proiet ajache l cianté à na gran mpurtanza tl nseniamënt ti prim ani de scola. I mutons y la mutans sënt na gran legrëza a audì i sonns y la meludies. Ëi ie curiëusc de les purvé ora y nce de se muever aldò dl ritm. "L cianté mperen cun l cianté y l amor per l cianté se svilupea cun l cianté, dantaprima sce l vën fat n cumpania" sorissea l ntendënt scolastich ladin Roland Verra.
La produzion dla CD nueva se stiza sun n lëur che l maester Otto Dellago ova bele fat tl 1992 canche l ova cris ora passa 100 cianties populeres talianes per l nseniamënt te scola. Tl 2008 ova l Istitut Pedagogich Ladin dat ora n liber de chësta cianties juntan pro dessënies, notes y acorc. Sun gran dumanda de pudëi nce audì la cianties iel unì nvià via la produzion dla CD n culaburazion cun Benni Valentin dl studio Davide Records.
La CD dopla »Canzoni, canzoncine e filastrocche« ie mpartida do tematiches via per l ann de scola, do la sajons y la festes via per l ann. L ie unì cris ora cianties religëuses, de fantajia, da rì, sun tieres y cianties de cumpania. La registrazion ie unida fata a una usc te na tonalità adateda per sculeies y tl respet di dialec. La cianties ie cumpaniedes da strumënc. Tl cunzet dla CD iel unì tenì cont de lascé lerch a na maniera che la cianties possa ntan l nseniamënt mo unì arichides cun fantajia metan leprò strumënc y baratan ju danter ujes sëules y cor.
Le proiet coordinà da Felix Ploner unirà prejentà n mierculdi 20 de merz dala cater domesdì tla Cësa de Cultura de Sëlva.
---
Culaburadëures di media ie nviei ala prejentazion y de fé al savëi de chësc proiet.
as
Galaria dales fotografies
