Atualità

Acompagnamënt profescional y la colaboraziun cun i Comuns y cun la Seziun de Gherdëna dl VKE à garantì le bun funzionamënt dles döes scomenciadies, che é gnüdes metüdes a jì te Sëlva, a Santa Cristina, Urtijëi, Corvara y La Ila. "Por ti jì adincuntra ai bojëgns di geniturs, che à desmostrè le bojëgn y n gran interès por n proiet da d'isté por i mituns y les mitans dla scolina y dla scora elementara, unse organisé en chësc isté ti mëisc de messè y agost programs cun n acompagnamënt profescional de mitans y mituns de plü edemes te Gherdëna y tla Val Badia", spliga l'assessur por la scora ladina Florian Mussner che é contënt da podëi insciö respogne al bojëgn de tröpes families olache tramidui i geniturs laôra. 

Te Gherdëna él gnü metü a jì te düć trëi i Comuns le program d'assistënza "L'isté di mituns" por i mituns y les mitans tres le proiet "L'Pavël" en colaboraziun danter la scolina ladina, i Comuns de Urtijëi, Santa Critsina y Sëlva y la Seziun de Gherdëna dl VKE ("Verein für Kinderspielplätze und Erholung") che se crüzia inće di contribuć, dles sales, dl personal y dles ativitês plü importantes. Tó pert podô mituns dai 4 ai 11 agn, a Urtijëi él gnü formè trëi grups ( i pici dai 4 ai 6 agn, i mesans dai 7 ai 8 agn y i gragn dai 9 ai 11 agn) a Santa Cristina y a Sëlva dui grups (dai 4 ai  6 agn y dai 7 ai 11 agn). Indöt él gnü metü a desposiziun di geniturs n program de sis edemes (dai 7 de messè ai 15 de agost). La surastanta dla seziun Gherdëna dl VKE, Irina Thaler,  confermëia la buna partezipaziun dles families: "Na gran pert dles families à anuzé chësta ocajiun y tröpes edemes ânse arjunt le limit plü alt de capazité."

Tla Val Badia él gnü organisé, en colaboraziun cun i Comuns de Corvara y Badia döes scolines da d'isté: öna a Corvara (5 edemes), dai 07 de messè ai 08 de agost y l'atra a La Ila (4 edemes), dai 14 de messè ai 08 de agost. "Cun la scolina da d'isté à i geniturs na poscibilité de ativitês te scolina adatades al'isté por sü mituns y sües mitans (cun le bel y bur tëmp) tratan i mëisc zënza scolina y che é inće gnüda anuzada da de plü families. I geniturs â la poscibilité da chirì fora danter danmisdé o döt le dé sciöche ia por l'ann y le numer d'iscrić à bastè por pité inće le domisdé", spliga l'ispeturia dles scolines Edith Ploner. Ara sotrissëia la buna colaboraziun cun i Comuns de Badia y Corvara che se crüzia da ti mëte inće a desposiziun la marëna ai pici y da romenè sö la scolina. La cualité dl sorvisc é gnüda garantida da de plü educadësses y da n educadù cun esperiënza. Tut pert à indöt 33 mitans y mituns a Corvara y 21 a La Ila.