Atualità
Imobiliars: Analisa dl status quo y dles poscibilitês de sparagn
Na suraodüda generala sön les proprietês imobiliares dla Provinzia y sön les poscibilitês de sparagn é gnüda presentada incö (mertesc ai 2 de setëmber) dal assessur por le patrimone Florian Mussner ala Junta provinziala. La Provinzia à implü incassè indöt 14 miliuns de euro por venüdes de areai militars.
La Junta provinziala à analisé incö le status quo por ći che reverda l’inventar di imobiliars de proprieté provinziala, tolon inće en conscidraziun le potenzial dl sparagn economich tl dagnì. Le raport é la basa sön chëra che al gnarà laurè por ciafè fora poscibilitês de sparagn, dantadöt por ći che reverda la chestiun di afić. Dl’analisa presentada incö fêjel inće pert i cosć por ći che reverda les strotöres y i obieć en afit, che, insciö à sotrissé l’assessur Florian Mussner, dess gnì conscidrà sciöche ezeziuns. „Ma sce nostes strotöres ne se basta nia o sce al va debojëgn da sistemé ofizi y sorvisc te strotöres en afit por gaujes de ressanamënt y renovamënt de d’atres strotöres vëgnel tut en conscidraziun da afité locai“, insciö l’assessur Florian Mussner incö (2 de setëmber) tratan la conferënza stampa do la sentada dla Junta provinziala, che presentëia inće les strategies de sparagn: „L’obietif dla Junta provinziala sarà chël da smendrì i tëmps d’afit y insciö orunse inće antizipé proieć che nes daidarà da sparagnè sön i afić.“
Öna dles mosöres concretes é insciö inće gnüda presentada incö: le proiet dla sënta nöia dla Repartiziun Personal provinzial tla strada Ritten a Balsan. „Por le frabicat nü él gnü aprové incö mudaziuns al plan urbanistich y insciö él poscibl da sparagnè sura 840.000 euro de cosć d’afit al ann“, spliga l’assessur. N’atra mosöra concreta é contignüda tles propostes de lege Omnibus che é gnüdes trasmetüdes al Consëi provinzial. La Junta provinziala à inserì n passus legislatif cun chël che al gnarà adotè na lege statala che prevëiga la diminuziun di afić dles istituziuns publiches de zirca 15 porcënt. „Cun i cosć di afić che é atualmënter de 5,2 miliuns de euro él poscibl da sparagnè 750.000 euro al ann cun chësta mosöra“, insciö Mussner.
N’atra chestiun che la Junta provinziala à analisé incö é stada la venüda de imobiliars provinziai, dandadöt i imobiliars che é passà dal Stat ala Provinzia. „Dles indöt 2700 parzeles che é passades dales forzes armades dl Stat ala Provinzia n’él gnü venü ćina śëgn indöt 1178“, spliga l’assessur Mussner. 391 parzeles é passades debann dala Provinzia ai Comuns o a organisaziuns che les adora por fins de interès publich. „Insciö ùnse venü ćina la fin dl 2013 areai militars (puncri, casermes, deponüdes de muniziuns, strades) de n valur complessif de 14,375 miliuns de euro“, insciö Mussner.
La venüda de imobliars provinziai, spliga l’assessur Mussner, messass en ligna de prinzip gnì conscidrada sciöche n’opziun „normala“ canche al se trata de frabicać o areai che ne vëgn nia plü adorà dala provinzia.
rc
