Atualità
Dai 5 ai 7 de setëmber: UNESCO – Labfest Dolomites Unesco a La Val
Poscibilitês de discusciun, seminars, musiga, films, ativitês culturales y de grup: döt chësc é le Labfest Dolomites Unesco che vëgn organisé dai 5 ai 7 de setëmber a La Val y che pita n program ampl de discusciun y informaziun sön les tematiches dla cultura da munt y dles Dolomites sciöche patrimone UNESCO.
Le tema zentral dla manifestaziun, che é gnüda metüda a jì dal grup ISOPSE dla Provinzia de Belun, é le „Sié“ te sües formes plü desvalies y sciöche forma d’espresciun dla cultura da munt: la tematica gnarà laurada sö tratan i trëi dis dl festival cun seminars, scomenciadies culturales, esposiziuns, films, letöres de scriturs y artisć, ativitês de grup y musiga. La coltivaziun di pra da munt é öna dles espresciuns tipiches dla cultura da munt sciöche forma de sconanza y mantignimënt dla contrada. „Por so mantignimënt tl dagnì é n’adoranza ecologica y estensiva de majera importanza“, spliga l’assessur por l’ambiënt y le presidënt dla fondaziun UNESCO Richard Theiner.
La temtica dl sié gnarà insciö presentada te sües espresciuns plü desvalies. Al sarà presënt tratan le festival na seria de esperć dl monn dla geografia, dl’architetöra, dl’urbanistica y dla contrada, dl’antropologia, dles sciënzes naturales, dl’economia y dl turism che portarà dant sües idees y propostes sön i aspeć desvalis dl tema chirì fora (p.e.: l’importanza dl sié por la contrada, por l’ecuiliber danter anuzamënt dl teritore y sconanza dla contrada, l’importanza economica). La tematica gnarà presentada te formes leterares y artistiches adoran le jornalism ambiental, la documentaziun, l’aministraziun dl teritore, la musiga, la leteratöra, le teater, le cujiné, la fotografia.
L’idea dl LabFest é gnüda formulada dal organisaziun ISOIPSE, n grup de profescionisć lëdi dla Provinzia de Belun. Por l’organisaziun se fistidiëia la fondaziun Unesco, l’assoziaziun turistica da La Val, la Lia di Paurs locala, l’Ofize Parcs naturai, le sorvisc de consulënza por l’agricoltöra da munt „Bring“, l’Ispetorat forestal da Bornech y de plü uniuns da La Val y dla Val Badia. Les informaziuns sön le program y les ativitês organisades tratan le festival pon ciafè ajuntè y sön la plata internet:http://www.dolomitesunescolabfest.it/.
rc
