Atualità
55 proiec Euregio tl 2016: mobilité, cultura, jogn, lingac
Mobilité y ambiënt, archirida y inovaziun: chisc é i seturs olache l’Euregio Tirol-Südtirol-Trentin ampliará süa colaboraziun, cun n’atenziun particolara ala tematica di migranc. Les deliberaziuns te chisc seturs é gnüdes aprovades incö (ai 18 de novëmber) dal GECT a Bruxelles, olache la presidënza é passada dal Tirol al Trentin. L’agenda 2016 prevëiga 55 proiec por 2,5 miliuns de euro.
Le passaje dl turnus dla presidënza GECT (Grup europeich de cooperaziun teritoriala), che ti spetará por i proscims dui agn al Trentin cun a cé Ugo Rossi, é gnü formalisé incö (ai 18 de novëmber) a Bruxelles, olache i suranstanc dl’Euregio s’á incunté en gaujiun di vint agn dala fondaziun dl Ofize de rapresentanza europeica deboriada dl Trentin, Südtirol y Tirol. Implü él ince gnü definí incö i proiec Euregio por le 2016 cun l’obietif prinzipal da porté adöm les porsones, por che ares pois imparé a se conësce y colaboré adöm. I seturs prinzipai, insciö á sotligné Rossi, sará la formaziun y l’archirida, l’ambiënt y la mobilité. Le presidënt Kompatscher á sotligné che la chestiun dl trafich dess gní portada inant en colaboraziun strënta danter les trëi provinzies sciöche ince confermé dales deliberaziuns tutes incö: „Cun l’obietif da sconé l’ambiënt tles regiuns alpines él öna dles ghiranzes de döta l’Euregio da sposté le trasport de marcianzies dales strades sön les scines adöm ince ala realisaziun dl tunel de basa dl Prener y en acordanza cun les regiuns vijines, sciöche ince ghiré dal coordinadú dl TENT Pat Cox“, insciö Kompatscher.
Sön proposta dl suranstant Platter él ince gnü tut la dezijiun da istituí n grup de laur che se dais jö cun la chestiun di spostamënc di migranc. „Por le momënt él 300 porsones che passa le confin dl Prener vigni de y i ne savun nia sciöche la situaziun se svilupará inant tl dagní. Al sará nezesciar da analisé tresfora la situaziun por ester arjigná ca“, á dit Platter. Le GECT á implü doté le Fonds scientifich por l’archirida cun 1,6 miliuns de euro. Ala Provinzia de Belun ti él implü gnü dé le status de osservadú.
I proiec finanziars sará por le 2016 indöt 55 cun n budget de söporjö 2,5 miliuns de euro. Le program 2016 aprové dala Junta dl GECT prevëiga danter l’ater la realisaziun de n calënder cultural dl’Euregio y le Family Pass suraregional. N’atenziun particolara ti vëgn ince dada al insegnamënt di lingac y al monn dl Université. Cun l’Euregio Family Pas gnarál a se le dé n model nü cun alisiraziuns finanziares por les families te aziëndes, istituziuns publiches y privates o sön i mesi de trasport. Tl 2016 gnarál ince realisé n calënder cultural deboriada y n canal de presentaziun di evënc cultruai di trëi raiuns dl’Euregio. Implü gnarál svilupé n app por l’emergënza sö por munt en colaboraziun cun l'organisaziun de socurs alpin "Bergrettung Tirol", le CNSAS Trentin, le Socurs alpin BRD/AVS Südtirol y le CNSAS Südtirol che pormënt da salvé les porsones ferides o pordüdes te na manira ciamó plü efiziënta. N proiet sön le program por le 2016 é ince la realisaziun de n boletin por les lovines sura döt le raiun dl’Euregio por mioré la gestiun dles situaziuns prigoroses. Tl setur dla sanité sará le focus por le proscim ann le zënter de protonterapia de Trënt: na colaboraziun plü strënta danter les provinzies, le barat d’informaziuns y de protocoi dess mioré la cura di paziënc te chësc setur por döta l’Euregio.
Tl dagní ará ince le GECT na funziun plü ampla cun plü competënzes tl setur dles relaziuns cun l’Europa y cun la sënta a Bruxelles. La Junta GECT á definí ince na strategia por la partezipaziun a programs europeics. Por plü informaziuns prëibel vijité la plata internet: www.europaregion.info.
rc
Galaria dales fotografies
