Atualità
Dala Junta: criters por les premies dl Program de svilup rural 2020
La Junta provinziala á aprové incö (al 1 de dezëmber) les diretives de aplicaziun dles trëi mosöres dl program nü de svilup rural che ti garantirá al Südtirol 366 miliuns de euro tla perioda 2015-2020. Les diretives reverda la promoziun dl’agricoltöra pro i paiamënc agro-tlimatics-ambientai, l’agricoltöra biologica y le paiamënt de compensaziuns por les zones da munt svantajades.
Tl mëis de ma á la Comisciun europeica aprové le program de svilup rural dla Provinzia de Balsan por la perioda 2015 – 2020. Le budget complessif che sará a desposiziun dla Provinzia é de 366 miliuns de euro da fonds publics, de chisc 158 miliuns sciöche ressurses europeiches. I obietifs dl program é dantadöt la sconanza y la promoziun di ecosistems, l’efiziënza pro l’adoranza dles ressurses, mo ince la competitivité dl’agricoltöra da munt y l’atuaziun de intervënc a bëgn dles arees svantajades tres i proiec „leader“.
Incö, al 1 de dezëmber, á la Junta provinziala aprové les diretives de aplicaziun che reverda trëi mosöres dl Program de svilup rural nü, presentades dal assessur Arnold Schuler. Chëstes trëi usc dles premies cür söporjö dui terzi dl buget complessif dl Program nü. Les diretives fej referimënt ala perioda danter jená dl 2015 cina dezëmber dl 2020 y reverda les mosöres n. 10 por i "Paiamënc agro-tlimatics-ambientai", n.11 por l’ "Agricoltöra biologica" y n. 13 por le "Paiamënt de compensaziuns por zones da munt": ma chësta ultima mosöra de compensaziun vel dötadöm 117 miliuns de euro.
rc
