Atualità
Val Badia: Operes de proteziun ti Comuns de Mareo y La Val
Operes de proteziun cuntra i prighi dal’ega alta, dala tomada da roes y dala pordüda dla vegetaziun tipica é gnüdes stlütes jö ti Comuns de Mareo y de La Val. Dla coordinaziun y realisaziun de chisc laurs s’á fistidié l’Ofize sistemaziun de rüs de munt y paralovines ost dla Repartiziun Costruziuns idrauliches.
Chësc ann él sté meso da stlü jö i laurs por la costruziun de proteziuns cuntra l'ega alta dl Rü d’Al Plan tla zona artejanala “Möbel Mareo” dlungia la localité Framacia tl Comun de Mareo. I laurs de costruziun, che á albü n cost complessif de 540.000 euro, á preodü n ampliamënt dl rü sön indöt 150 metri tla zona al prigo y mürs de proteziun cun petun d’aciá dlungia la pert orograficamënter a man dërta dl rü. Por podëi evité che le rü vais porsura cun ega che rovass sön la strada statala él sté nezesciar implü da amplié le rü sön n toch lunch indöt 450 metri. Al é ince sté debojëgn da mëte de gran peres sön la pert orograficamënter a man ciampa y da porté demez material pro les perts plü strëntes. Cun chëstes mosöres dess döt le raiun dal’entrada dl Rü de La Pli tla zona artejanala “Möbel Mareo” cina Longega gní metü en segurëza, dantadöt pro stravardé dal’ega alta. Ince dlungia la localité La Crëpa él gnü amplié y adaté le Rü d’Al Plan sön indöt 120 metri. Por garantí ince la proteziun dla ciasa cun abitaziuns Winkler él sté nezesciar da costruí sön la pert orografica a man ciampa mürs de proteziun y da ressané n punt. Por la proietaziun y la direziun di laurs él gnü inciarié Martin Moser, Markus Passler s’á indere fistidié dl grup de laur.
Por mëte en segurëza le raiun abitatif Mirió, che ê te n raiun cun prigo de roes sot le raiun de Ciurnadú tl Comun da La Val, él gnü realisé barieres de deviaziun de 40 metri lunges. Cun n investimënt de 55.000 euro él sté meso da fá chisc laurs y da finanzié ince i laurs de cura dla vegetaziun tres le percurs dl Rü Cialt y la costruziun de n implat da pumpé ega tl raiun artejanal de Pîdro sön domanda di Stödafüch da La Val. Le proiet é gnü realisé da Martin Moser, che é ince gnü inciarié dla coordinaziun di laurs, Markus Passler s’á indere fistidié dl grup de laur.
rc
