Atualità
De mondial di migranc y profugs: Lauré adöm por n’integraziun che garetes
L’acoliënza di migranc, so acompagnamënt y süa integraziun tla sozieté é n valgönes dles tematiches prinzipales dl De mondial di migranc ai 17 de jená. „La chestiun di migranc é na sfidada soziala che i messun afronté düc adöm“, dij l’assessuria por les politiches soziales en gaujun dl De internazional.
Le De mondial di migranc y di profugs la terza domënia de jená é gnü istituí dl ann 1914 da Papa Benedët XV y á ciafé ti ultims agn tres plü atualité: le Comissariat dles Naziuns Unides (UNHCR) y l’Organisaziun Internazionala por la Migraziun (IOM) arata che un n miliun de porsones á messü s'un sciampé da sü Paisc Nadé tl vers dl’Europa porvia de veres, porseghitaziuns y meseria. Tl Südtirol aspeta por le momënt indöt 900 porsones, partides sö te 14 cuartiers sön le raiun provinzial, che süa domanda de asil ciafes na resposta. „Do la daurida dla ciasa de acoliënza a Urtijëi l’edema che é stada gnarál sëgn tosc ince daurí la caserma a Eppan“, á dit l’assessuria Martha Stocker. Por merit dla colaboraziun cun i Comuns él sté meso ti mëisc passá da spartí i migranc sön döta la Provinzia y chësc é ince n vantaje por l’integraziun y l’assistënza, insciö Stocker.
L’integraziun di ’zitadins nüs’ é ince tl zënter de plü grups de laur, che s’á incunté plü iadi y che se fistidëia dl acompagnamënt di migranc do la valutaziun positiva de süa domanda do asil. „Les porsones che viará chiló tl Südtirol dess ciafé la poscibilité da vire na vita autonoma“, insciö l’assessuria. „Y chësta é na sfidada che jará ma da desgropé düc adöm, l’Aministraziun provinziala, les organisaziuns d’assistënza di profugs, les Comunités raionales y i Comuns, les assoziaziuns economiches y i sindacac, les uniuns y düc i volontars atifs“, á prezisé l’assessuria che amonësc ince da ne conscidré nia dötes les porsones che damana do asil automaticamënter ince sciöche terorisć potenziai o porsones violëntes. „Nüsc dac y nostes analises nes confermëia cina sëgn che les porsones che á damané do asil tl Südtirol ne é prësc mai gnüs segnalades negativamënter“, dij Stocker che vëiga ince la spartiziun di migranc sön de plü ciases tla Provinzia sciöche n fatur important por che l’integraziun pois garaté. “Ma cun conzec d’integraziun sarál poscibl da evité problematiches tl dagní, y chësc depënn naturalmënter dala responsabilité de vigni singul migrant, mo ince da chëra de döta nosta sozieté.“
Por informaziuns plü monüdes él ince gnü publiché la brosciüra „Asyl und Flüchtlinge in Südtirol“ da ciafé sot a http://www.eurac.edu/en/research/autonomies/minrig/publications/Documents/12-18-Broschuere_A4-DE-DEF.pdf.
rc
