Atualità
Start dla macroregiun alpina EUSALP: Kompatscher sará ai 25/01 tla Slovenia
Le presidënt dla Provinzia Arno Kompatscher y i suranstanc dles atres regiuns dará le start ofzial ala macroregiun alpina (EUSALP) en lönesc ai 25 de jená a Brdo tla Slovenia: al evënt sarál ince presëntes les comissares UE por les Politiches regionales Corina Cretu y por i Trasporc, Violeta Bulc, y de plü Ministri di Paisc interessá.
La macroregiun alpina tol ite la Talia, l’Austria, la Francia, la Germania y i dui Paisc fora dal UE (Liechtenstein y Svizra) cun na popolaziun complessiva de 70 miliuns de abitanc – 14 miliuns de chisc vir te zones alpines – partida sö danter 48 Regiuns, danter chëstes ince naturalmënter le Südtirol y le Trentin.
Do che tl 2015 á l’UE aprové la strategia EUSALP él sëgn gnü le momënt por le start ofizial. La scomenciadia, organisada dal Minister por i afars esters dla Slovenia en colaboraziun cun la Comisciun europeica, vëgn metü da jí a Brdo, dlungia Lubiana, en lönesc ai 25 de jená cun plü co 500 partezipanc: al ne sará nia ma presënc i suranstanc dles Regiuns mo ince rapresentanc de impreses, organisaziuns nia governatives y rapresentanc dla sozieté zivila. Danter les autorités presëntes sarál ince la comissara europeica por les Politiches regionales, Corina Cretu, y la comissara europeica por i Trasporc, Violeta Bulc.
EUSALP é la cuarta strategia macroregionala reconesciüda ofizialmënter da Bruxelles y messará deventé na plataforma che ti pormetará ales Regiuns alpines da lauré ala per cun l’UE y i Paisc comëmbri pro la chirida do soluziuns ales esigënzes di raiuns alpins. La Provinzia de Balsan á sciöche obietif chël da ester rapresentada tla governance de EUSALP por ci che reverda le „Strategy Point“. Implü é öna dles ghiranzes che le secretariat dl EUSALP vëgnes intergé tla sënta dl’Euregio a Bruxelles.
LE GECT Euregio Tirol-Südtirol-Trentin, insciö spliga Kompatscher, „se candidëia ince por ester a cé dl grup de laur dla macroregiun por ci che reverda la mobilité alpina y intermodala cun l’obietif prinzipal da adoré i mesi de trasport te na manira capilara y smendrí insciö le trafich sön les trasses alpines. La Provinzia de Balsan é bele a cé ince dl grup d’aziun tl setur dla politica energetica, olache ara podará anuzé les cualité tl setur dl’efiziënza energetica y dles formes de energia renovables.“
La conferënza d’inauguraziun dla macroregiun en lönesc ai 25 de jená tla Slovenia sará ince le start por de plü reuniuns tecniches ai 26 por cöi adöm propostes concretes da podëi spo atué tl contest de EUSALP.
rc
