Atualità
Dala Junta: 19 miliuns por la manutenziun straordinara dles strades
Por la manutenziun straordinara de 2826 chilometri dles strades, 1662 punc y 206 galaries sön les strades statales y provinziales él a desposiziun por le 2016 indöt 19 miliuns de euro. Le program spezifich é gnü aprové incö (ai 23 de forá) dala Junta provinziala.
I laurs da ciafé tl program de manutenziun straordinara dl Sorvisc strades dla Provinzia ne reverda nia ma i intervënc sön i tlandri de strada por mëte en segurëza les trasses prigoroses, mo ince i laurs da asfalté y chi de ressanamënt di punc, di tuní y dles strades en general. La Junta provinziala investësc tl 2016 indöt 19 miliuns de euro por la manutenziun straordinara dles strades y le program spezifich é gnü aprové incö, mertesc ai 23 de forá, sön proposta dl assessur por la mobilité Florian Mussner.
„Chisc intervënc é nezesciars por garantí y aumenté la segurëza sön strada y por les mantigní te de bunes condiziuns“, á recordé l’assessur Florian Mussner do la sentada. Implü él important da monitoré tresfora la situaziun dles strades statales y provinziales, che nes conzed da eliminé i dagns eventuai y da antergní te situaziuns de prigo tres la costruziun de mürs de sostëgn y da stabilisé les sperses dlungia. „Düc i intervënc vëgn realisá tres na lista de priorités prezisa che conscidrëia döta la rëi stradala“, á ajunté Mussner. Les mosöres é definides avisa do vigni sajun da d’isté canche i colaboradus dl ofize tecnich á n’idea plü tlera dla situaziun dles strades te döta la Provinzia.
Ince dl 2016 reverda la majera pert di investimënc dl prorgam provinzial dla manutenziun straordinara laurs d’asfaltatöra, por chi che al é preodü 7,6 miliuns de euro. I intervënc sön i tlandri de strada y i mürs de sostëgn prevëiga na spëisa de indöt 2,7 miliuns y por la metüda en segurëza di parëis él preodü 2,3 miliuns de euro. Por la manutenziun di punc él gnü destiné indöt 1,5 miliuns de euro. Sciöche l’assessur Florian Mussner á recordé „pó la maiú pert dles inciaries gní surandades a impreses locales en’acordanza cun les poscibilités che la lege söi apalc nes dá.“ Insciö él sté meso da surandé dl 2016 na gran pert dles inciaries a impreses locales, che ti é insciö jödes a bëgn dl’economia locala.
rc
