Atualità
Cina ai 29 de ma plü controi dla polizia sön les strades
Tl contest dla campagna de sensibilisaziun „No Credit“ gnarál amplié i controi dla polizia da indoman cina en domënia ai 29 de ma sön les strades südtirolejes.
Da indoman, jöbia ai 26, cina en domënia ai 29 de ma s’aspeta les forzes dl ordin dla Provinzia n aumënt dl trafich, dantadöt da pert de motoziclisć y ghesć dl’area todëscia. Insciö gnarál fat ti proscims dis, tl contest dla campagna „No Credit“, ne seria de controi dla polizia locala cun ince la destribuziun di jorantis d’informaziun por i motoziclisć cun indicaziuns sön les strades plü prigoroses tl Südtirol y tl Trentin. L’assessur provinzial Florian Mussner rengraziëia la polizia locala, les forzes dl ordin y la zentrala viabilité por la buna colaboraziun che garantësc plü segurëza sön les strades. „Cun les aziuns de sensibilisaziun tl contest de No Credit orunse ti recordé a düc i autisć la responsabilité sön strada cun na velozité adatada ales condiziuns dl tëmp, dla strada, dl trafich y dla visibilité“, dij l’assessur por la mobilité y la rëi stradala Florian Mussner.
Dlungia i controi dla polizia locala y la spartiziun de jorantis á la campagna de "No Credit" ciamó trëi d’atri pilastri fondamentai. Por aumenté la segurëza di motoziclisć él insciö preodü, sciöche ince ti agn passá, n’ajornamënt costant dla segnaletica y dl’ilomiaziun dles strades, n ressanamënt dl asfalt danejé y l’istalaziun de tlandri dla strada nüs cun na proteziun aposta por i motoziclisć sön les trates dër prigoroses. Inant jará ince la colaboraziun cun le Safety Park.
rc
