Atualità
Consëis de aministraziun: Curs de preparaziun por ëres
La scomenciadia é sostignida dala Comisciun provinziala por l’avalianza d’oportunités y é gnüda presentada incö ai 29 de lugio dal’assessuria Stocker.
Alzé la presënza feminina ti Consëis d’Aministraziun y tles posiziuns plü altes di sindacac é un di obietifs prinzipai dla Comisciun provinziala por l’avalianza dles oportunités. Le curs de formaziun nü ti é propi dediché a chësta funziun de aconsiadëssa de aministraziun y vëgn organisé en colaboraziu cun le WIFI – Formaziun y svilup dl personal dla Ciamena de Comerz de Balsan.
L’assessuria provinziala por l’avalianza dles oportunités Martha Stocker á ilustré tratan la presentaziun la strada lungia bele fata dales ëres ti ultims dezenns por arjunje posiziuns de pröm livel. Sciöche l’assessuria á recordé él bele gnü a se le dé daimpröma na lege sön l’avalianza dles oportunités tl 2010 y spo tl 2012 l’oblianza dla presënza de almanco n terzo ti Consëis d’Aministraziun y ti Colegiums di sindacac de sozietés publiches. Do da 5 agn dal’aprovaziun dla lege é la prozentuala passada dal 1 porcënt cina a rové al 33 porcënt de presënza ti Consëis de aministraziun y da 2 porcënt cina a sura 30 porcënt ti Colegiums di sindacac. L’aumënt dla presënza feminina contribuësc ince ala poscibilité da podëi arjunje resultac economics plü alc por les aziëndes y organisaziuns, sciöche al vëgn ince desmostré da plü inrescides scientifiches te chësc setur.
La presidënta dla Comisciun provinziala por l’avalianza dles oportunités, Ulrike Oberhammer, á sotligné la nezescité y l’importanza dl curs de formaziun por rové te consëis d’aministraziun. Le curs vëgn ince sostigní dal Ordin di Avocac y é davert por avocadësses, notaies, comerzialistes y dirigëntes, mo ince por ëres che á n mandat de coordinaziun. Por podëi tó pert al curs vëgnel damané na laurea te n setur iuridich o de economia, almanco 3 agn de esperiënza profescionala o almanco 10 agn de esperiënza te na posiziun da dirigënta. Do le percurs formatif gnarál istituí n register cun espertes che á dötes les condiziuns nezesciares por podëi tó pert ti Consëis d’Aministraziun y ti Colegiums di sindacac. Le curs dess ince ester na sbürla por avëi ciamó de plü ëres ti CdA, á splighé la direturia dl WIFI dla Ciamena de Comerz, Christine Platzer.
Le curs é partí sö te 6 dis cun 4 ores vigni de por trëi finsdledema dai 30 de setëmber ai 12 de novëmber. I posć a desposiziun é 20, l’iscriziun é poscibla cina ai 23 de setëmber dl 2016. Por plü informaziuns prëibel consulté la plata internet www.wifi.bz.it (WIFI, Elisabeth Falser, tel. 0471 945 666 - wifi@camcom.bz.it).
rc
Galaria dales fotografies
da man dërta: Ulrike Oberhammer, l'assessuria provinziala Martha Stocker, y Christine Platzer, direturia WIFI-Formaziun
