Atualità
Dala Junta: bandida FESR por l’inovaziun, 4,4 miliuns de euro
4,4 miliuns de euro é a desposiziun por proiec d’inovaziun cun n valur tecnologich alt. Sides istituziuns publiches co ince assoziaziuns pó fá domanda.
„Archirida y inovaziun“ é un di cater pilastri prinzipai che reverda le program operatif FESR (Fonds europeich de svilup regional) che vëgn finanzié cina al 2020 cun indöt 32 miliuns de euro. Incö, ai 30 de agost, á la Junta provinziala aprové la deliberaziun dla bandida por l'ann 2016 dedicada ai proiec d’inovaziun. „La bandida á n budget complessif de 4,4 miliuns de euro che vëgn metüs a desposiziun por intervënc de cualificaziun dl’oferta di sorvisc cun n valur tecnologich alt“, á recordé le presidënt dla Provinzia Arno Kompatscher.
Le finanziamënt é ponsé da öna na pert por sostigní la creaziun de impreses nöies y dal’atra pert por svilupé les potenzialités dles impreses bele esistëntes. Les arees d’intervënt dla bandida é l’energia y l’ambiënt, les tecnologies agroalimentares y alpines, i tratamënc de cures naturales y tecnologies de medejina y l’industria creativa. Por che le proiet vëgnes ametü mëssel avëi na dorada mascimala de trëi agn y n cost danter 150mile y 1 en miliun d’euro. Les domandes pó gní dades jö cina ai 28 d’otober. Al pó tó pert ala bandida ënc publics, istituziuns d’archirida y assoziaziuns economiches de categoria. Le program operatif FESR 2014-2020 dla Provinzia á na dotaziun complessiva de indöt 135 miliuns de euro, de chisc 50 porcënt da fonds europeics, 35 porcënt da fonds statai y 15 porcënt da fonds provinziai.
Por plü informaziuns sön les bandides FESR: www.provincia.bz.it/fesr
rc
