Atualità
Derjon: pëscia eletrica dan i lëures de frabica
Te n raion dl Derjon àn messù tò ora duc i pësc ajache l’Agenzia per la prutezion zevila messova mëter a jì iló lëures per seguré l ruf.
Te chësc raion dl Derjon iel n plunf cun n puent, na luegia strënta che reprejentea n rëm tl cajo de eghes autes. Sce n tol demez l plunf vëniel avanà l profil de regureda dl’ega y i pësc à la puscibltà de passé. La piëda di pësc tres pëscia eletrica ie unida dejëuta dal ufize provinziel per la ciacia y la pëscia adum cun l’Agenzia per la prutezion zevila y la lia di pëiapësc de Laion.
Dal Plann di raions de pericul dl chemun de Pruca vëniel ora che pertes dl zënter dl luech ie tla zona cuecena. "Na simulazion nes à mustrà che l puent d’azes sëura l Derjon ala cësa Runggaldier pudëssa reprejenté, adum cun l plunf dessot, n rëm nia da sotvaluté tl cajo de eghes autes", tlarësc Rudolf Pollinger, diretëur dl’Agenzia per la prutezion zevila. Dantaldut tres la seva tamez dl puent pudëssel iló se ntravaië sienes y lëns zarëi pea y stué l ruf. "Sce l Derjon ëssa tlo da jì sëurora pudëssa l’ega ruvé, tres l tunel de zircunvalazion che mëina te Gherdëina, nchin ora a Pruca y mëter sot ega l zënter dl luech“ nsci Pollinger.
Chësc pericul dëssa śën unì bandì. L capolaurant Hubert Rungger dl ufize Sistemazion ruves da mont y peralevines nord dl’Agenzia per la prutezion zevila tulerà demez cun si lauranc l plunf y la seva tamez dl puent. Cun chësc pruvedimënt ne vëniel nia mé avanà l profil de regureda dl’ega ma l vën nce crià la puscibltà che i pësc posse passé.
"Per fé a na maniera che i pësc posse passé tres l Derjon ons bele tëut demez sies plunfs sota l puent", dij l proietant y dirijënt di lëures Andreas Vettori. Oradechël àn chëst ann da d’ansciuda ressanà l mur de spuenda sun la pert orografica a man drëta y auzà mpue y stabilisà l liet dl ruf cun salandrons. Ti ani fova l liet dl ruf unit giavà ora drët sot y l’ega ova slavatà y giavà sotora l mur de spuenda y cundechël nce la streda provinziela de Gherdëina. "Dan uni ntervënt", nsci Vettori, "vëniel tëut ora i pësc dal ruf tres pëscia eletrica per no mëter tl pericul l patrimone itich. La culaborazion cun l ufize per la ciacia y la pëscia y la lia di pëiapësc de Laion ie stata scialdi bona.
I lëures vën cofinanziei dala SE Hydropower GmbH.
usp
Galaria dales fotografies
