Atualità

USP – La Jonta provinziela à auzà la tarifes per jënt da oradecà che muessa sté ti spedei. “Chëstes vën majera pert paiedes dal’assegurazions y ne toca perchël nia cis la jënt. Dal’autra pert fejel ora truep per curì l custimënt” à dit Luis Durnwalder.

USP – La Jonta provinziela uel fé valëi l prinzip dl’acurdanza de Milan danter Stat y Provinzia, che 9/10 dla chëutes che vën da Bulsan dëssa automaticamënter unì mandedes de reviers. Chësc à i assessëures provinziei fat ora (ncuei) ai 04 de lugio.

USP – La Jonta provinziela a dit de sci ala soluzion che ti ie unida prejenteda per taché ite la scines al toch nuef che ie debujën danter Pruca y Furtëza. Chësc toch ie essenziel per la funzionalità dl tunel de basa dl Prëner.

USP – La Jonta provinziela de Bulsan se à(ncuei) ai 04 de lugio dat ju cun la situazion dla stabilità finanziera per chëla che a Roma vëniel chisc dis fat tratatives. La Provinzia de Bulsan y Trënt, deberieda cun la regions autonomes tol su cuntat cun l minister Tremonti per damandé che l dëssa unì tenì cont dla situazion particulera ulache sparanië scioldi per debic che n ne à nia fossa me contraprodutif.

USP – Ncuei, 4 de lugio, vëniel sarà la streda provinziela danter Rina y Arntermëia ajache tl tunel iel udù dant lëures de doi enes. I auti possa astilé ora su na streda alternativa.

USP – Cina dl 2013 dess düc i comuns dl Südtirol ester colià a internet tres fires otiches a na manira da garantì coliamënc plü asvelc. Chësc é ci che la la Junta provinziala s’à tut dant por mantignì la competitivité dl Südtirol sön le marcé. Na majera pert de chisc laûrs vëgn fata por la popolaziun dla Val Badia, olache al vëgn investì feter 3.611.000 euro.

USP – La Repartizion ladina dl’Università liedia de Bulsan dëssa unì svilupeda inant. Te n’ancunteda danter l assessëur provinziel ladin Florian Mussner, l presidënt dl’università Konrad Bergmeister y l cuordinadëur dla Repartizion ladina Theodor Rifesser iesen stai a una sun l bujën de realisé n Istitut de Ladinistica y na mëisa de descuscion per miuré la culaburazion cun la istituzions ladines.

USP – 13 lëures y nvestizions per 3,4 milion de euro cumporta l rë de fibres otiches che unirà fates tl raion Salten-Scilier. „L ie n gran custimënt, ma i vantajes per l raion ie mo majeri“ dij l assessëur provinziel Florian Mussner cunscidran che raions zënza internet slune ne puderà tosc nia plu tenì l var sun l marcià. Un de chisc lëures vën nce fat a Urtijëi.

USP – La Jonta provinziela à ncuei tëut doi dezijions sun dumanda dl Cunsëi dl chemuns. Cun n‘agenzia per sëurandé ncëries publics uelen pité n servisc plu efizient per la Provinzia y nce per l’autra aministrazions publiches. Sun dumanda di chemuns iel mo n iede unì spënt la data per i planns di raions de pericul. I chemuns reverda nce la partizion de scioldi dala zentreles dal strom. Families y pendolares à giapà na reduzion dla tarifes dl trasport publich. Per stravardé l tlima uelen arjonjer plu ressanamënc de vedla cëses y n trasport cun energia alternativa.

USP – Da plu mënsc oven scumencià a lauré tl sistem dla tarifes dl trasport publich, la Jonta provinziela à (NCUEI) ai 20 de juni dat pro l sistem nuef. L ie unì mantenì l prinzip che premia chiche furnea de plu y sëuraprò iel mo unì udù dant reduzions per families y pendolares.