Ispetorac

Tl’Intendënza y Cultura ladina él al momënt trëi ispetorac:

  • l'Ispetorat Integraziun y consulënza
  • l'Ispetorat por les scolines ladines
  • l'Ispetorat por les scores ladines
  • l’Ispetorat por l’insegnamënt de religiun
I ispetorac acompagnëia le personal dirigënt, le personal dles scolines, le personal insegnant y educatif y düc i partners formatifs tres la consulënza y le sostëgn, y i dëida ciafé na soluziun tl caje de problems tl ciamp dla formaziun. I ispeturs y les ispeturies laora te grups de laur, te comisciuns y gremiums istituzionai desvalis. Ai se barata fora regolarmënter cun i atri sistems formatifs dla Provinzia, arjigna ca mosöres por sostigní le svilup dl insegnamënt, sostëgn la realisaziun dles diretives cheder y fej laurs de conzet por n svilup sostenibl dl sistem formatif ladin. I ispetorac garantësc la cualité di prozesc de formaziun, se crüzia dla realisaziun di dovëis legai y aconsiëia l'intendënt/intendënta dles scores.

Le team dl ispetorat laora por na scora inclusiva. Nosc laur é pité na consulënza avisa y adatada a döt le personal dla scolina y dla scora y ai geniturs y atué strategies por sostigní les scolines, les scores de vigni ordin y degré y les families. I se cruziun de handicap y dificoltés d'aprendimënt, bojëgns educatifs speziai (BES), mitans y mituns cun n background de migraziun y cun esperiënzes particolares, sciöche ince de conflic y situaziuns de crisa. Implü ti pitunse al personal dirigënt y insegnant cursc de formaziun sön chisc temesc.

Chiló ciafëise, sciöche familia, dötes les informaziuns plü importantes por la iscriziun, le calënder de scolina y la direziun provinziala dles scolines sciöche ince i raiuns dles scolines.

Scolines ladines

L'ispetorat scolastich sostëgn le personal dirigënt scolastich te de plü ciamps dla vita da vigni de, sides por ci che reverda la pert tecnich-aministrativa che ince chëra didatich-pedagogica. Ara nen vá sovënz da ciafé deboriada na soluziun a problems eventuai dla vita da vigni de dla scora. L'ispetorat scolastich á chisc compic:

1. Mosöres por garantí la cualité y sostigní l'inovaziun tl ciamp dla formaziun

  • Elaboraziun de mosöres por inrescí, garantí y svilupé inant la cualité dl insegnamënt y dl'oferta formativa tla scora ladina,
  • elaboraziun de propostes por adaté y realisé i obietifs dla reforma tl ciamp dla scora, che vëgn preodüdes dales desposiziuns provinziales y statales,
  • sostëgn de proiec inovatifs tl ciamp dl svilup dla scora,
  • colaboraziun da realisé inrescides, stüdi y proiec d'inrescida,
  • colaboraziun cun universités y d'atri zëntri d'inrescida,
  • colaboraziun cun le Ministere por l'istruziun,
  • consulënza spezialistica por l'intendënt/intendënta.

2. Verda

  • Verda y sostëgn pro i ejams finai te scores mesanes y altes,
  • valutaziun dl sorvisc dl personal dirigënt dla scora aladô dles desposiziuns varëntes,
  • realisaziun de ispeziuns y controi sön inciaria dl intendënt/dl'intendënta,
  • elaboraziun de segnalaziuns y domandes sön inciaria dl intendënt/dl'intendënta.


3. Svilup dl'organisaziun y dl personal

  • Planificaziun y realisaziun de cursc por le personal dirigënt,
  • colaboraziun da planifiché, realisé y valuté la formaziun permanënta dl personal dirigënt y insegnant de düc i liví scolastics,
  • acompagnamënt y sostëgn dl personal dirigënt dla scora y dl personal insegnant, danterater tl ann de formaziun profescionala y tla fasa da mëte man da lauré.

Compic

  • Colaboraziun cun l'Intendënza
  • Coordinaziun dl insegnamënt de religiun catolica
  • Acompagnamënt y sostëgn dl personal insegnant de religiun
  • Planificaziun dl ajornamënt
  • Colaboraziun cun l'ordinariat

 

L'Ispetorat de religiun sostëgn les istituziuns formatives da realisé süa inciaria de formaziun y sostëgn le svilup scolastich. Al stimolëia prozesc inovatifs y surantol sön inciaria dl intendënt/dl’intendënta laurs de verda.
L'ispetur/L’ispeturia de religiun tëgn le contat cun le personal insegnant de religiun, le personal dirigënt, l'intendënt/intendënta y l'ordinariat al sorvisc dla comunité dla scora y dla sozieté. L'ispetur/ispeturia de religiun laora cun l’ordinariat di vëscui y cun i atri ispeturs/les atres ispeturies de religiun.
L'insegnamënt de religiun catolica avijinëia ala fede y ala cultura cristiana, renforza l'identité personala, sostëgn les scolares y i scolars che chir na süa identité y dëida capí la rajun dla vita. Al pita valurs cristians y aiüt tl orientamënt, renforza la capazité de comunité y toleranza. L'ispetorat de religiun dëida y sostëgn le personal insegnant de religiun, al aconsiëia, acompagnëia y se crüzia de chestiuns pedagogiches, metodich-didatiches y di contignüs.
Les manifestaziuns de formaziun vëgn planificades, organisades, coordinades y realisades a na moda da garantí la miú continuité poscibla.
Düc i compic vëgn realisá ciaran da jí a öna cun l’imaja dla porsona cristiana y sü valurs.