Jonta provinziela dl 27 de utober
USP – Nce sce l ie l di di resultac dla veles, à la Jonta provinziela ncuei tenì si senteda a Bulsan. Dessot i ponc de majer nteres prejentei dal Presidënt dla Provinzia Luis Drunwalder.
Recurs n cont dla segurëza publica
L Guviern provinziel a fat ora de fé recurs ala Suneria de Cassazion n cont dla cumpetënza dla Cuestura de Bulsan de śaré cin locai publics se stizan sun l test unich dla leges n cont dla segurëza publica. La se trata tlo dla lista di juesc nia lascei pro y l dé ora buandes alcoliches ora dl’ëura lasceda pro. “Son dla minonga chëla cumpetënza de śaré i locai, sibe me dla Jonta provinziela, à dit l presidënt Durnwalder, la Cuestura à me l duvier de fé la prupostes”.
Cuntroi dla Guardia di Finanza
L Guviern à nciarià l presidënt Durnwalder de se fé inant pra i respunsabli de cuntroi dla Guardia di Finanza. “L nes ie unì fat al savëi che ultimamënter iel unì fat cuntroi dassënn ncompri, nchinamei cun joleri. Ne ulon dessegur nia fé na descuscion sun l lëur dla Guardia di Finanza, ma la lege dëssa unì nterpreteda cun plu fundamënt y zënza criminalisé la jënt” à dit l Presidënt.
Scola de piloc
Davia che tl Südtirol ne iel nia na scola per piloc, à la Jonta fat ora de dé n cuntribut a chi che va oradecà a fé cursc y spezialisazions. Chëi che mpera da pilot giaperà na borsa de studi de 20.000 Euro al ann, per i doi ani che dura la furmazion. “Al mumënt ons feter 15 dumandes, spiega Durnwalder, ma l cuntribut ne giaperà nia duc. Da śën inant uniral un ann fat n cuncors per doi piloc de joler y 2 de julier”.
Stabilità
L ie bel unì fat i prim vares per l proscimo bilanz provinziel. Aldò dl pat de stabilità che cëla do l custimënt dl aministrazion publica, à la Jonta provinziela laurà ora na pruposta da mandé al Guviern de Roma n cont di ponc da junté y da tò demez dal pat de stabilità. “Penson dantaldut ala scola y la sanità, spiega Durnwalder, ma n iede se tratela de udëi sce nosta prupostes vën azetedes y ce lerch che arà la tratatives. Sce l Guviern a Roma ie a una, sarà l proscimo bilanz de 5,581 miliarc de Euro, che ie feter 3% de plu permez al ann passà”.
as
