Ultimi lëures sun la streda da Pruca ite
USP – Sun la streda statela danter Pruca y Puntives vëniel chëst ena fat i ultimi lëures de mantenimënt dan l inviern. Sëura la ustaria Stern iel ncuei, (merdi 28 de utober) unì metù n semafer per lascé mpo passé l muvimënt sun streda ntan l lëures.
Al chilometer 6,2 vëniel fat da nuef la fundamëta y l dlander de streda sun na lunghëza de feter 80 metri. Bele l’ena passeda iel unì fat da nuef la ëur de streda cun n pitl mur de peton. Te chësta luegia ulache la streda da Pruca ite à la majera pendënza, fovel gran ëura de cumedé l ëur de streda. “L se trata tlo de n lëur che on metù sun la lista de gran priorità per miuré la segurëza de chëi che passa sun chësta streda”, spiega l assessëur ala stredes Florian Mussner.
Dan trëi enes ova la firma Reinstaller de Bulsan scumencià cun la prima pert di lëures, riesc sota Puntives. L lëur che vën śën fat ie la segonda pert dla medema ncëria. L custimënt de tramedoi lëures deberieda ie de feter 50.000 Euro.
“I lëures ie jic drët bën, i lauranc à fat n bon lëur y l bon tëmp à ënghe judà” nsci l assessëur Florian Mussner. “Perchël fajons cont te pudëi tò demez l semafer mo dan chësc fin dl’ena.”
Chësc ie l ultimo lëur che vën fat sun la streda statela danter Pruca y Puntives dan l inviern.
Sun l toch danter Puntives y Urtijëi iel unì finà de seguré l parëi de crëp. Riesc do Unissant uniral sëuraprò mo taià lëns sëura l parëi.
L puent a Runcadic unirà finà tla proscima enes, per Nadel fejen cont de pudëi lascé passe l muvimënt di auti sun l puent nuef.
as
