Miuramënc dla streda danter Plan y Plan de Gralba
USP – Sun la streda danter Plan y Plan de Gralba vëniel fat doi lëures de miuramënt. Nchin ala fin de nuvëmber possa l muvimënt di auti passé aldò de n semafer.
La streda che porta da Sëlva sun i jëufs de Frea y de Sela ie a luesc drët stleta. Riesc sëura Plan, al 23esim chilometer, vëniel fat n majer lëur per tenì su la streda. Sun n toch de feter 50 metri iel debujën de micropei acioche la streda ne arsësc nia.
Riesc dessëura, sëura la raida da Merch, uniral fat da nuef n mur sun na lunghëza de feter 100 metri. “Sibe d’inviern, che nce d’instà iel n gran muvimënt de auti y mesuns pesoc sun chësc toch, y tlo fovel gran debujën de seguré la streda” spiega l assessëur provinziel Florian Mussner.
Tramedoi lëures per n custimënt de ndut ca. 300.000 Euro (zënza Iva) vën fai dala firma Ausserer de S.Felice tla Val di Non.
Per chisc lëures iel uni tant nce debujën de saré duta la streda y perchël muessen fé cont de aspité nchin a n chert d’ëura. Per finé prësc chisc lëures vëniel nce laurà ntan l fin dl’ena. Nchin ala fin de nuvëmber fejen cont de finé tramedoi lëures y nsci de pudëi tò demez l semafer.
as
Galaria dales fotografies
Foto USP/Losso
