“Le liber de storia dl monn” a Badia y Colfosch
USP – Cun n cunzert geologich vëniel tla Val Badia lecurdà i 30 ani da canche l ie unì metù su l parch naturel Puez-Odles. “Le liber de storia dl monn” ie l titul de chësta sëira che unirà tenida n vënderdi ai 7 de nuvëmber tla Cësa Jan Batista Runcher a S.Linert de Badia. Na segonda reprejentazion uniral mo fat n dumënia 16 de nuvëmber tla Cësa Tita Alton de Colfosch.
Plu che na cunferënza, vëniel aldò di urganisadëures dl Ofize Parcs naturai, l Consëi Cultural de Badia y l Consëi de Formaziun de Corvara, tenì n cunzet geologich. La se trata n prima linia de nosta montes. L geologh Michael Pescolderung y l atëur Simon Kostner ti va do ala dumanda de can, co, ulà y ciuldì che se à furmà la Dolomites. Cun fotografies y ejëmpli pratics uel ëi purvé a spieghé l svilup geologich che à purtà ala furmazion de nosta cuntreda unica y cunesciuda sun dut l mond. Dut chësc unirà purtà sun palch cun paroles scëmples y a na maniera da plajëi.
Argumënt zentrel ie la cuntreda da mont dl Parch naturel Puez-Odles che fova unì metù su avisa dan 30 ani.
La sëira dëssa nce vester n avenimënt musichel. Co che la scienza possa unì prejenteda deberieda cun la mujiga se spiega te chëla che Michael Pescolderung ne ie nia me geologh, ma nce n prufesciunista de suné l corn. Per l’ucajion al metù adum si doi pascions y à nvià doi ensambles cunesciui de mujiga da banda. L sunerà l Herum Cuintet dla Val Badia y n cuartet de corni dla Val Badia y de Funes.
La sëira ie velch per pasciunei de natura y de mujiga, per pasciunei dla montes y per duc i nteressei. La doi reprejentazions, n vënderdi ai 7 a Badia, y la dumënia ai 16 a Colfosch scumëncia dala 8 da sëira.
as
