Frabiché | 07.11.2008 | 17:44

L gran puent de S. Cristina ie su

USP – La zircunvalazion nueva de S. Cristina giapa forma: do che n à batù tres tramedoi tuniei y trëi puenc ie bele metui su, vëniel chisc dis fat l lëur che dà plu al uedl. Cun n gran cran vëniel auzà su de gran scines de fier per mëter su l majer puent. Cun chësc puent de 72 metri de lunghëza vëniel fat l’ultimo majer lëur dla streda nueva.

De ndut pëisa la scines dl puent 210 tones, chël ie tant sciche 200 auti mesans. La prima trëi scines sun na lunghëza de 43 metri ie unides auzedes su ncuei vënderdi (7 de nuvëmber). La segonda pert dl puent, de 29 metri, unirà metuda su n mierculdi 12 de nuvëmber. Nce tlo vëniel metù su trëi scines che muessa purté la streda. “Chësc ie l lëur plu spetaculer de duta la streda de zircunvalazion" dij l assessëur ala stredes Florian Mussner. Per auzé su i gran fieres iel de bujen de n cran aposta. Bele l fé unì adalerch chësta gran mascin y la mëter ju tla drëta luegia cumporta cun nosta stredes da mont y la puecia lerch, truepa dificulteies.
Uni scina ie metuda adum da doi toc. Chësta doi pertes vën auzedes su a 19 metri da fonz y pona fates adum canche les ie bele posizionedes. La pert plu zitia ie l mëter ju la doi pertes dla scines tla drëta luegia y les fé adum. "Dut l puent fej na raida y perchël muessel unì laurà cun gran prezijion" spiega l ing. Georg Fischnaller de Urtijëi.
Canche la scines ie fermedes te si luegia uniral metù su plates de peton y sëuravia vëniel mo fat na soletta de 30 cm.

Cun l majer puent à duta la streda de zircunvalazion de S. Cristina giapà forma sun na lunghëza de 1679 metri. „I lëures va inant drët aslune y chësc ie de gran valor per la populazion de S. Cristina” nsci Mussner. Ai 16 de utober fovel unì batù tres l tunel Saslong (de 375 metri). Tl tunel Monte Pana (475 metri) fejen bele la isolazion y l revëut dedite ora. I doi mëndri puenc de danter i tuniei ie bele feter finei. Nce sce la dificulteies geologiches pra l tunel Saslong a tenì su n pue duc i lëures, sons śën a n bon pont”, se ncunforta l assessëur Florian Mussner. Sce i lëures possa jì inant do program, fejen cont de pudëi per Nadel bele lascé furné provisoriamënter sun l prim toch dla zircunvalazion nueva. A chësta maniera ne muessa i auti che uel ruvé da Ruacia bele ntan chësc inviern, nia plu passé tres l zënter de S. Cristina.

as

Galaria dales fotografies