Frabiché | 12.11.2008 | 15:37

L majer puent a S.Cristina à giapà forma (ntervista audio)

USP – L majer puent dla streda nueva de zircunvalazion de S. Cristina à ncuei, (12 de nuvëmber) giapà forma. L ie unì metù su l ultima pert dla gran scines de fier, sun chëles che passerà i prim 72 metri dla streda nueva per astilé ora S. Cristina. “I lëures ie drët a n bon pont y tosc ne messerà la jënt de S. Cristina nia plu purté l pëis dla gran muvimënt de auti tres l luech” à spiegà l assessëur Florian Mussner.

Trëi de gran scines de fier porta la streda che unirà fata per ruvé dala raida de Greva nchin dal autra pert dla valeda, sun Plan d’Artic. Ncuei iel unì auzà su l ultima pertes de chësta scines. Cun n gran cran an messé tenì su i toc, 29 metri lonc, y i fé adum ntan che i tacova tl’aier. L pont plu aut de chësc puent ie a 19 metri da fonz. L ie stat n lëur drët zite ajache l puent fej na raida. Davia che l fier ie unì blandà dala plueia iel sta mo plu rie a fé chësc lëur de prezijion.
Per auzé su i toc dla trëi scines an fat unì adalerch n gran autocran da 400 tones. Chësc mesun ie lonch 20 metri y se à bele stentà a unì adalerch y a se mëter tla drëta luegia per fé l lëur. L toch de fier plu pesoch che ie unì auzà su pëisa 47 tones. Duta la pert de fier de chësc puent pëisa de ndut 210 tones.

“L fej dassënn plajëi a udëi che i lëures ie bele tan inant, per Nadel fajons cont de pudëi lascé furné provisoriamënter sun la prima pert dla streda nchin da Ruacia”, nsci l assessëur ala stredes Mussner. D’ansciuda 2007 oven scumecià cun i lëures y te passa n mëns dëssen bele pudëi furné sun la prima pert. De ndut se tratel de na streda longia 1.660 metri cun doi tuniei (de 375 y 475 metri) y de cater puenc.

“Chësc ie n tëmp da record y perchël ti feji na lauda ala firmes che ie tlo cun feter 100 persones che à laurà te cundizions n pert nce periculëuses per via dla cundizions geologiches.” à sorissà l assessëur Florian Mussner. Pra l tunel Saslong an messé giavé te material smuià, chësc a custà plu tëmp y scioldi. N fej cont che danter proietazion y lëures uniran a spënder de ndut ntëur 30 milion de Euro. “La jënt de S. Cristina à nchin śën messé tenì ora truep muvimënt a mesa l luech su, cun codes d’auti tl ërt ulache l vën nce mpestà dassënn l aria. Perchël iel stat gran de bujën de fé chësc nvestimënt” nsci Florian Mussner.

“Per chësta zircunvalazion ova l Chemun da S.Cristina deberieda cun la Provinzia de Bulsan bel laurà 5 ani danora y pona ons nëus dl 2002 pudù jì inant cun i lëures per la proietazion” spiega l assessëur Mussner, “perchël sons drët cuntënt de tan riesc che dut a pudù jì inant”.

Per la viabilità de duta Gherdëina se à l assessëur bele ancuntà cun i ambolc di chemuns nteressei per ruvé a n cunzet generel. “La va de udëi deberieda cie che ie de bujën y cie che ie realisticamënter puscibl fé” nsci Mussner.