Mostra interregiunela 2009 dedicheda a labirint y lidëza
USP – Labirint y lidëza ie i doi argumënc a chëi che vën dedicheda la mostra interregiunela 2009 che unirà giaurida ai 9 de mei tl furtin de Franzensfeste. Ciuni che sarà i cuntenuc dla mostra iel unì prejentà a Bulsan dal Presidënt dla Provinzia Luis Drunwalder y dal’assessëura Sabina Kasslatter Mur.
“Ulon dediché l majer nteres ala lidëza, n valor fundamentel dla cumenanza y dla persona, da no renunzië” nsci l pensier dl presidënt Drunwalder. “Per la mostra interregiunela 2009 ons cris ora na forma defin nueva, à dit l’assessëura Kasslatter Mur, dajan mpurtanza a argumënc soziei te n cuntest storich.” Tramedoi à sorissà che la mostra ie penseda per duc, sibe n cont de generazion che de rujeneda. La ntreda ala mostra davierta dal 9 de mei ai 30 de utober, ie debant.
Te chësta ucajion uniral per l prim iede nuzà la lerch dl furtin mesan y de chël plu bas a Franzensfeste. La mostra interregiunela “Labirint::Lidëza” à n cunzet a trëi linies: la storia, massaria da uni di y opres d’ert. L unirà metù ora 200 pec te 86 lueges. La mostra ie mpartida te ot argumënc: la cumenanza, la rujeneda, la mubilità, la perjunia, cunfins, savëi-furmazion, religion y ert. Tl furtin sviluperà la mostra l cunzet dla libertà tres n labirint de lueges y porc che pieta ucajion de pensé do y de se pierder. “Chësc ajache la stredes che porta ala libertà ie ntravaiedes y zënza tofles” à spiegà i autores dl proiet. N rujenerà danter auter de plurilinguism y gabies linguistiches, de tò su l svilup y de vester spevesc a mparé, de rebelions de prijunieres, de artisć y scienziac.
A Franzensfeste ne iel nia udù dant n troi da ti jì do, ma perchël saral lueges per n pichnich y lueges da fé damat. La coordinazion dl proiet ti unida sëurandata al museum de Ciastel Tirol, l’urganisazion ie dla Repartizion provinziela di Bëns culturei, la Repartizion dla frabiches y servisc tecnich. Tla grupa de lëur iel Richard Veneri, Christian Schwienbacher, Paul Thuille y Alex Susanna, che à dl 2007 venciù l cuncors nternaziunel per chësc proiet. Curadëures ie Marion Piffer Damiani (ert), Bernhard Kathan (massaria da uni di), Hans Karl Peterlini (stories y cuntedes).
Duta la nfurmazions sun la mostra interregiunela 2009 ie nce da abiné tla rujeneda ladina sota www.lab09.net/ladin tl internet.
as
