Ancunteda per la zircunvalazion de Sëlva
USP – Aministradëures y tecnics se à ncuei (25 nuvëmber) ancuntà per stlarì i particuleres dl cuncors scrit ora per na streda de zircunvalazion per Sëlva. Tla Cësa de cultura de Sëlva iel unit adalerch passa 80 persones che à mustrà gran nteres per l cuncors. “L cuntat persunel cun i tecnics juda dassënn a arjonjer la miëura soluzion al gran problem dl trafich te Sëlva” sorissea l assessëur ala stredes Florian Mussner.
Na maniera nueva de ti jì permez a de gran proiec iel ncuei unì praticà te Sëlva. I respunsabli di lëures publics dla Provinzia de Bulsan à prejentà a na gran cumpëida de tecnics nteressei cie che n se aspieta tl cuncors per na zircunvalazion de Sëlva. I tecnics à pudù fé dumandes y nsci iel stat mesun stlarì danora nce i mëndri particuleres. “Chësta forma inovativa de ancunté i tecnics à bele te d’autra sperimentazions purtà de bon fruc”, nsci l assessëur Mussner “perchël se aspitons nce tl cajo de Sëlva de giapé la miëura soluzion al problem dl muvimënt di auti tl luech.”
Te Sëlva iel unì purtà dant la situazion dl trafich n generel te Gherdëina. L proiet per Sëlva dëssa ji pea cun n cunzet generel che tën nce cont dl muvimënt ti autri luesc dla valeda y di pasc ntëur ala Sela. Da pert dl Assessorat ala stredes se aspieten vijions n chësc cont.
Ai tecnics ti iel ncuei unì metù drët a cuer de tenì cont dl ambient y dla cuntreda. “Justa te na valeda turistica ie la cuntreda la gran richëza y perchël muessel unì proietà cun gran sensibilità” se damanda l’assessëur Florian Mussner. De chësc vieres à ncuei nce l diretëur dla repartizion ing. Valentino Pagani metù a cuer che dlongia la carateristiches tecnics, de costruzion se aspieten gran respet per la cuntreda.
I criteries prinzipei do chëi che unirà valutà la iedeies di tecnics ie la viabilità, la soluzions tecniches y strutureles. Truep pëis ti vëniel nfati dat a tan bën che la zircunvalazion passena tla cuntreda dla valeda. N plu uniral nce tëut n cunsciderazion la cualità arachitetonica y dl cialé ora, l’urganisazion dl areal da frabiché, aspec economics, l se mantenì y l custimënt de mantenimënt.
I 51 tecnics che ie unic a se tò la documentazion dl cuncors muessa dé ju la ideies y prupostes nchin ai 3 de fauré 2009. L frabiché dla zircunvalazion de Sëlva possa unì a custé nchin a 32 milion de Euro.
as
