Hutia Las Vegas: cundizions dan dé pro l proiet
USP - L proiet per mëter a post la cuestion dl ngrandimënt dla utia Las Vegas tl chemun de Badia ie ncuei (25 nuvëmber) unì tratà dala Segonda cumiscion per la defendura dla cuntreda. La cumiscion provinziela se damanda vel cundizions dan dé pro l proiet.
Dan dé pro l proiet de ngrandimënt dla utia Las Vegas, se damanda la Segonda cumiscion per la defendura dla cuntreda na lingia de ntervënc y che l vënie respetà la cundizions metudes dant. Chësc à detlarà l presidënt dla cumiscion Adriano Oggiano, do la senteda da ncuei, 25 de nuvëmber. Tlo iel unì tratà l proiet purtà dant al chemun y mandà ite dal patron. La cuestion dl ngrandimënt cualitatif y cuantitatif dla utia ora de regula, fova unida trata su dala Procura dla Republica.
La cumiscion se damanda dantaldut de zaré ju la pertes che ne respetea nia la normes urbanistiches. Chëla pertes che unirà descurides tres chësc lëur, dëssa unì curides defin cun na strutura de lën. La straufonga per l dann ala cuntreda unirà calculà aldò dla cubatures nia lascedes pro. L Chemun de Badia messerà dì tan de straufonga che l ie da paië per via dla pertes che ne respetea nia la cunzescion de frabiché data ora dal chemun. Tramedoi cuestions resta per ntant mo daviertes n cont dla pruzedura dla Procura dla Republica. Chësta pruzedura ie unida fata aldò dla ex lege Galasso (dl 1985) per strutures sëura i 1.600 metri de autëza.
La terassa che ie n pert unida curida cun trames de lën messerà unì tëuta demez y l rone muessa unì nverdià. Chësc vel nce per l tët dla garasc. L ie mplu unì damandà de ti sté do ala stabilità idrogeologica y perchël iel unì damandà na cauzion de 40.000 Euro. L raion ntëur la utia via muessa crëscer ite y giapé n bel cialé ora cun vel planta y sasc. Te chësc raion passel sibe d’instà che d’inviern truepa jënt, tlo passa nce i troies danter Piz Sorega y Corvara, Piz La Ila y San Ciascian.
as
