Orars da d’inviern tl trasport publich
USP - Cun l segondo fin dl’ena de dezëmber va n drova i orars nueves da d’inviern per l trasport publich dla Provinzia de Bulsan. L assessëur Thomas Widmann à prejentà la nuviteies cun danora la ferata nueva tla val de Puster. I fins de Widmann per l daunì ie de plu stabilità di orars y uni mes’ëura n trasport ntan i mumënc de majer bujën.
De pu ferates per i pendolares, n servisc che respetea mo miec i bujëns dla jënt da tlo y di fulestieres, y sëuraprò mo nuef ferates nueves te Puster. Chëstes ie la nuviteies prinzipeles per l inviern 2008/09. I orars nueves va n drova l 14 de dezëmber. „Aldò de na cunvenzion nternaziunela sons sfurzei a fé mudazions per l inviern, cialon purempò de purté ite stabilità per i orars ntan dut l ann“ à dit l assessëur ala mubilità. Chësc ie dantaprima de utl per se nuzé dl trasport publich y per la cuinzidënzes de curieres y ferates.
Cun i orars nueves scumëncia nce l servisc dla ferata nueva te Puster. Ntan i mënsc passei iel tlo unì fat ncrujedes nueves y cumedà la stazions per ntëur 40 milion de Euro. La ot ferates nueves furnea uni mes’ ëura danter Franzensfeste y Burnech. Danter Burnech y Sanciana/Innichen vëniel furnà uni ëura. „Te doi ani sperons de avëi uni doi ëura n culegamënt cun Lienz tres Puster, y cun Dispruch sëura l Prëner“ nsci Widmann. Tla Val Venuesta, danter Maran y Bulsan, y sun la lina dl Prëner furna tan i fins dl’ena de plu ferates.
Tres la bona culaburazion cun la ferates iel ntan i ultimi 8 ani stat mesun aumenté i chilometri dl trasport publich de mo n tant. Cun 2,2 milions de passajieres ie la ferata dla Val Venuesta deventeda n model per l’Europa. Pra la curieres iel ntan i ultimi cater ani unì furnà 14% chilometri de plu. Feter trëi milions de persones ie furnedes cun i citybusse. „La streda che on tëut ie a uni maniera la drëta“ à stlù ju l assessëur provinziel.
as
