A La Val uniral cumedà la streda de Pidro
USP – La Jonta provinziela de Bulsan à dat pro la carateristiches tecniches di lëures de miuramënt dla streda a La Val. Danter Pidro y la frazion Lé uniral slargià la streda, miurà la raides y mplu uniral nce fat n tretuar. “Chësc lëur purterà plu visibilità a chëi che furnea y plu segurëza a chëi che va a pe” spiega l assessëur Florian Mussner.
La stleta visibilità dl prim toch dla streda da Pidro de viers de La Val ie n gran problem. L Assessorat ai lëures publics à perchël dat priorità ala preparazion tecnica per pudëi miuré l prim toch de streda. Sun na lunghëza de 424 metri, cun pendënza media de 8,6%, uniral splanà y slargià la streda. “Per l muvimënt sun la streda strënta y cun la truepa raides strëntes ie chësc n gran miuramënt” spiega l assessëur ala stredes. La streda da Pidro su unirà slargëda a 5,5 metri. Sun l toch de streda iel nce n puent de 14 metri.
Per chëi che va à pe possel tres l lëur unì miurà dassënn la segurëza. Cun n tretuar, plu aut permez ala streda, uniral miurà dassënn la spartizion dla lerch per i mesuns motorisei y la jënt a pe. Per passé saurì nce cun n bagli, unirà l tretuar fat sun na larghëza de 1,5 metri. Te chësta luegia passa trueps a pe per jì ala stazion dla curiera.
Sëuraprò ala miëura visibilità y l miuramënt dla raides, ie l miuramënt dla streda a Pidro dantaldut de utl per pité de plu segurëza ti auti y a jì pe. Tres i lëures unirà mplu tëut demez la lueges da passé via la streda. “L proiet vëija danora n cunstimënt de 1,49 milion de Euro y muessa śën unì ntegrà tl program di lëures” spiega Florian Mussner.
as
Galaria dales fotografies
Foto USP
