Ntervënc per la nëif te dut Südtirol, dut a post tla Ladinia
USP - La nëif dl’ultima nuet y dla prima ëures de ncuei daduman (prim dezëmber) à purtà de majeri problems tl Südtiriol. De plu luesc ie restei zënza strom, zënza telefonn y zënza trasport publich. I jëufs ntëur l Sela ie sarei, scenò ne iel feter degun problems de viabilità tla Val Badia y te Gherdëina.
La scuadres dl Servisc provinziel ala stredes lëura tla Val Badia y te Gherdëina bele da duta la nuet per garantì l muvimënt sun la stredes prinzipeles. Tla doi valedes al bele fat nchin a 90 cm de nëif. Sota l pëis dla truepa nëif à truep lëns zedù tuman sun streda. Sëuraprò ala nëif à i feter 40 uemes dl Servisc provinziel ala stredes ncuei nce messé rumé demez rames y lëns sturcei. Te chësc lëur ies unic judei da truep ulenteres di Destudafuech. “Tres la culaburazion dl Servisc provinziel y i ulenteres di Destudafuech iel unì fat n gran servisc” rengrazia l assessëur ala stredes Florian Mussner.
Per pericul de levines an messé saré i jëufs ntëur al Sela. Sun l’autra stredes prinzipeles de Gherdëina y Badia ne iel feter degun problems per l muvimënt.
Ti majeri zëntri dl Südtitol se an ncuei plu stentà a ruvé do cun i ntervënc. A Bulsan ova i destudafuech da mesa la nuef da duman bele fat 30 ntervënc. Te dut Südtirol fova de chëst ëura 193 grupes di Destudafuech n azion. Sanciana/Innichen ie nchin la nuef da duman restà zënza strom, tlo al fat n meter de nëif. Maran, Partschins, Burnech, Percha y Toblach ie nchin danmesdivia restà zënza strom y n pert zënza telefonn. Sun la linia dl ferata dal Val Venuesta iel sturcià lëns, la jënt ie unida meneda cun curieres.
as
