L puent a Runcadic finà per l scumencé dla sajon
USP – Duman vënderdi (5 dezëmber) puderan furné sëura l puent nuef a Runcadic. “Davia che te chësta luegia danter Urtijëi y Puntives passa nce truepa roles, iel stat n gran lëur che ne ne vëija nianca a passé” spiega l assessëur ala stredes Florian Mussner. L puent ie unì finà te tëmp da record, adrët per l scumencé dla sajon.
Da agost, canche n ova zarà ju l vedl puent dl stradon de Gherdëina fovel unì fat n puent de fier per lascé passe l muvimënt a na maniera provisoria y ova nce messé spusté la roles dla nfrastrutures primeres che passa tlo. De setëmber à n pona scumencià a fé l puent nuef. Mpede cin mënsc, an me adurvà trëi mënsc. Ncuei, juebia iel unì fat la proves ufizieles cun sies camions: l puent à tenì zënza poblemes l pëis de 33 tones. Per duman, vënderdi sëira puderà l muvimënt di auti passé sun l puent nuef. Nsci possel nce unì tëut demez l semafer.
Davia che sun l puent a Runcadic passa dut l muvimënt che ruva te Gherdëina da Pruca y Tluses ite, à l Assessorat ai lëures publics lascià fé n puent de prima categuria, per lascé nce passé i mesuns plu pesoc. L puent sëura l Derjon de Gherdëina ie 7 metri lerch y à na lunghëza de 27 metri. Chësta nfrastrutura fata da nuef ne pieta nia me plu segurëza ai auti y mesuns pesoc, ma nce a chëi dala rodes y a chi che passa a pe. “Da nuef, permez al vedl puent ie n tretuar y la lerch per na streda dala rodes.” Spiega l’assessëur Florian Mussner.
“La canalisazion de Gherdëina ie bele tacheda ite sota l puent nuef. Śën iel mo da spusté la roles per gas, strom y telefonn” spiega Enrico Rella, patron dl firma de Urtijëi che à fat i lëures. Permez al vedl puent ne iel nia plu na seva tamez. Sce l Derjon ëssa da mené truepa ega y material, ne iel nia plu pericul per chësc puent. L assessëur ai lëures publics, Florian Mussner rengrazia la firma che à laurà tan aslune per pudëi giaurì inò la streda te tramedoi viersc dan l scumencé dla sajon da inviern. “Sun chësc puent passa feter dut l muvimënt de Gherdëina y perchël sons cuntënt che pudon pité na miëur viabilità per l’economia dla val y dantaldut per la segurëza de duc chëi che passa” sorissea Mussner.
L asfalt fin y de mëndri particuleres unirà finei d’ansciuda canche se n va la nëif. La proietazion y l mené di lëures ie unida fata internamënter dal Assessorat provinziel, tres l’ing.ra Simona Sedlak. L custimënt di lëures y dla proietazion ie de 625.000 Euro.
as
Galaria dales fotografies
Foto USP/Stuffer
