Orars nueves per la ferates
USP – Ai 14 de dezëmber va n drova l orar da inviern per la ferata. La majera nuviteies reverda chëst ann la valeda de Puster ulache ai 14 de dezëmber furnerà la ferates nueves.
Cun l mëter mpe i orars da inviern iel unì fat vares inant per miuré l servisc te duta la Provinzia de Bulsan. “N à cialà de tenì cont dla truepa dumandes y prupostes da pert de plu grupes” spiega l assessëur Widmann. L ie unì dat pëis a miuré la puntualità y i culegamënc. Te Puster ie unì anjenià n cunzet generel.
Fé orars nueves uel di abiné na forma che respetea dumandes suvënz drët defrëntes y contraditories tenian cont dla defrënza cumpetënzes, pusciblteies tecniches y capaziteies.
„On pudù fé vares inant per ruvé a chël pont che danter inviern y instà ne sibe feter plu deguna mudazion di orars” sorissea Widmann.
Davia che vel linies naziueles y nternaziuneles dla ferates ie unides straichedes, iel stat debujën de mudazions dl’orar tla Provinzia de Bulsan al ultimo mumënt. I orars vën stampei chisc dis y ie bele da udëi sota www.sii.bz.it tl internet.
La nuviteies te Puster
Majera pert dla 8 ferates che la Provinzia à anjenià unirà adurvedes te Puster. A chësta maniera sëurantol la SAD feter doi terzi de duc i viages tl est dla provinzia. Trenitalia furnea l’autra pert di viages. Da nuef iel che danter Burnech y Franzensfeste furneia i dis da lëur, da duman (7.30-9.00) uni mes’ëura na ferata per ruvé nchin a Bulsan. Danter Sanciana/Innichen y Franzensfeste iel unì ëura n culegamënt.
Val d’Isarch
Ti mumënc de majer muvimënt, da duman y da sëira furnea tla val de Isarch, uni mes’ëura na ferata. Uni ëura iel na linia per ruvé a Maran y belau uni ëura nce a Dispruch.
as
