Sëurandà i lëures per l furnel dal refudam (ntervista audio)
USP – L assessëur ai lëures publics Florian Mussner à ncuei 10 de dezëmber sëurandà ufizialmënter i lëures per fé l furnel nuef dal refudam a Bulsan. Chësc furnel ie un di majeri lëures dl Guviern provinziel y dessegur la miëura soluzion per de plu ani, à sorissà Mussner.
“Schivé refudam y l spartì dëssa resté l prim pont, ma sciche Guviern provinziel messons nce sëurantò respunsabltà per tò y jì l refudam. L furnel dal refudam ie la miëura soluzion per truep ani” à dit ncuei l assessëur Mussner. Cun l brujé iel unì fat de bona sperienzes cun l refudam, vëniel dit tl Dipartimënt per l ambient, che se à sëurantëut chësc proiet deberieda cun l Dipartimënt per lëures publics. Aldò dl plann provinziel per l refudam, iel udù dant che dut l refudam nia spartì, vënie purtà tl mplant de Bulsan. Sëuraprò ala 80.000 tones al ann ruva nsci mo autra 50.000 tones a Bulsan. “L mplant da śën ie bele vedl y ne purtëssa nia la gran cuantità de refudam. Ntant ie nce miureda dassënn la tecnica de brujé y perchël ons tëut la dezijon de fé un n majer mplant nuef, mpede trueps de pitli” spiega Florian Mussner. L furnel vën fat aldò dla tecniches modernes cun de bon filter dal fum y tecniches per adurvé l’energia. L ciaut unirà adurvà per l sciaudamënt a destanza (30 MW) y l strom (16 MW) ruva tla rë publica. Tres l furnel dal refudam possel unì sciaudà 5.500 cuatieres y nce l’ega per chësta families. Cun l strom ciafiessa 3.000 cuatieres.
L mplant nuef unirà fat dlongia l vedl furnel dal refudam, pra la ntreda dl’autostreda Bulsan Sud. Nchin tl 2012 fejen cont de vester tan inant da pudëi giaurì l furnel nuef. L custimënt udù dant dl mplant de 196.449 metricubich ie de 98,5 milion de Euro. Tlo uniral brujà nchin a 130.000 tones de refudam al ann.
as
