1.200.000 Euro per la cultura ladina
USP – La Cunsulta culturela ladina se à ncuei (10 dezëmber) ancuntà a Bulsan per to tres l’ultima dumandes de cuntribuc per l ann 2008. Te si ultima senteda à la cunsulta mo cialà de reviers co che ie unì sustenì la cultura ladina ntan chësc ann. Cun la legislatura nueva dl’Aministrazion provinziela uniral nce metù su na Cunsulta culturela nueva. De ndut iel tres l Assessorat provinziel ladin unì dat ora cuntribuc per 1.200.000 Euro.
La Cunsulta culturela ladina a chëst ann tëut tres 199 dumandes per n aiut economich a bën dla cultura ladina. L majer capitul fej ora l’ativiteies cultureles dla lies y de artisć. La Provinzia de Bulsan a tl ann 2008 dat cuntribuc per de ndut 455.000 Euro a lies y artisć. Tl capitul de nvestimënc da pert dla lies cultureles, per anjenië strumënc, trochtes o fé ora la sënta dla lia, iel chëst ann unì cuntribuì cun 200.000 Euro.
I chemuns y la istituzions publiches à giapà n aiut finanziel per ativiteies y nvestimënc a bën dla cultura ladina. Chësc capitul fej ora de ndut 28.000 Euro tl ann 2008. Aldò dla valutazion dla Cunsulta culturela ie unì dat de ndut cuntribuc per 683.000 spartii sun 145 caji.
Sëuraprò ala dumandes valutedes dala Cunsulta culturela, à l Assessorat provinziel Ladin chëst ann sustenì l Istitut Culturel Ladin Micurà de Rü cun 395.000 Euro. Chësc ie un terzo de duc i scioldi a desposizion. Per la publicazion dla Usc di Ladins iel da pert dla Provinzia de Bulsan unì dat 52.000 Euro. La publicazion de media te na rujeneda de mendranza ie dastramp ria da finanzië ajache l ne ie nia mesun vënder truepa copies. Per chisc caji y per furmazion, à l Assessorat ladin judà cun 70.000 Euro. Cumpedan adum duc i capituli à la Provinzia de Bulsan tl 2008 sustenì la cultura ladina cun 1.200.000 Euro.
“La cultura ne dëssa nia avëi n valor economich, ma l ie mputant che se rendon cont che cun la pusciblteies economiches pudons sustenì proiec defrënc ti ciamps culturei.” dij l assessëur Mussner. “L anima dl’atività culturela ie daniëura la persones che se da ju cun i proiec tla lies ulenteres y tla istituzions cultureles. Tres si mpëni porta ëi pro che nosta cultura, tradizion y rujeneda possa viver inant tla generazions che vën do. La cultura y la rujeneda ie la seves per l viver inant de nosta mendranza.”
Cun la legislatura nueva dl’Aministrazion provinziela uniral nce numinà na Cunsulta culturela nueva. Chësta ie metuda adum da doi persones numinedes dal Guviern provinziel, doi reprejentanc sun pruposta dla lies y l assessëur ladin. La lies cultureles unirà nviedes tres posta a fé prupostes de reprejentanc dla Cunsulta culturela nueva. Ntan i ultmi cin ani à Lois Ellecosta, Hilda Sottara, Dr. Bruno Senoner, Dr. Hubert Irsara cun Florian Mussner (Presidënt) y Alexander Piccolruaz (scrivan) fat pert dla Consulta culturela ladina.
as
