Prutezion zevila: provinzia sëurantol linies radio
USP – La linies radio te duta la Provinzia de Bulsan, nce chëles che fova nchin a mo n gestion dl’uragansiazions de prim aiut, unirà cun l ann nuef sëurantëutes dala Provinzia. L cuntrat aldò ie unì sotscrì ncuei domesdì (30 dezëmber) da reprejentanc di Judacrëp, di Destudafuech y dla Crëusc Blancia cun l presidënt dla Provinzia Luis Drunwalder.
Nchinamo à i Judacrëp dla Lia da mont AVS, i Destudafuech ulenteres y la Crëusc Blancia cun la Prutezion zevila provinziela tenì mpe la linies radio. Chësta linies ie unides adurvedes deberieda, ma mpo nia ala miëur maniera. Śën dëssel unì laurà miec, sparanian nce tl custimënt.
L cuntrat che i unì sotscrì ncuei vëija dant che la urganisazions nteressedes sëurandà cun l prim de jené 2009 la linies ala Provinzia de Bulsan, che sëurantol nce la respunsabltà dl mantenimënt di mplanc. La cumpetënza ti vën sëurandata l Servisc de comunicazion radio dla Repartizion provinziela de prutezion zevila.
“Davia che chësta linies ie la basa per la comunicazion radio tla Provinzia, possa la urganisazions de prim aiut sambën les nuzé nce tl daunì” spiega Drunwalder. L sistem possa unì adurvà per rujené via radio, per dé alarm y per mandé dac.
La cuntrat per sëurandé la linies radio ie unì sotscrì n prejënza dl diretëur de repartizion Heinrich Holzer, Hanspeter Staffler, diretëur dla Prutezion zevila provinziela, Günther Walcher, diretëur dl Ufize provinziel per Prutezion zevila, i reprejentanc di Judacrëp Toni Preindl, dla lia di destudafuech Rudolf Hofer, y dla Crëusc Blancia Georg Rammlmair, cun l presidënt Luis Durnwalder.
as
